Бахшида ба Рӯзи варзишгарон, ки ҳамасола 10 август таҷлил мегардад, дар шаҳри Хуҷанд чорабинии тантанавӣ баргузор гардид. Дар ин рӯз мусобиқаҳои варзишӣ таҳти унвони “35 соли Истиқлол - 35 қуллаи варзиш”, ки аз рӯи 35 намуди варзиш барои дарёфти Ҷоми раиси вилояти Суғд роҳандозӣ шудааст, расман оғоз бахшида шуд.

Раиси вилояти Суғд Раҷаб Аҳмадзода аз рушди варзиш, тарғиби тарзи ҳаёти солим ва фароҳам овардани шароити мусоид барои тамрини ҷавонон ёдоварӣ намуда, онро аз самтҳои муҳими сиёсати иҷтимоии давлат маънидод намуд.

Гуфта шуд, ки дар партави дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар даврони соҳибистиқлолӣ барои рушди соҳаи варзиш дар вилояти Суғд тадбирҳои муҳим амалӣ гардида, заминаи моддию техникӣ таҳким ёфт ва барои тарбияи варзишгарони ҷавон имкониятҳои бештар фароҳам гардидааст. Варзишгарони вилояти Суғд дар мусобиқаҳои ҷумҳуриявӣ ва байналмилалӣ ба дастовардҳои назаррас ноил гардида, шарафи Тоҷикистони соҳибистиқлолро ҳимоя менамоянд.

Тавре зикр гардид, мусобиқаҳои варзишӣ таҳти унвони “35 соли Истиқлол -35 қуллаи варзиш” аз рӯи 35 намуди варзиш роҳандозӣ шудааст. Ҳадаф аз баргузории мусобиқаҳо рушди варзиши касбӣ, оммавигардонии варзиш, дарёфти истеъдодҳои нав ва ҷалби бештари наврасону ҷавонон ба тарзи ҳаёти солим маънидод гардид.

Дар доираи чорабинӣ намоиш ва барномаҳои гуногуни варзишӣ баргузор шуда, шахсоне, ки дар рушди варзиш ва тарбияи варзишгарони ҷавон саҳми арзанда гузоштаанд, бо туҳфаҳои хотиравӣ қадрдонӣ шуданд.

Субҳиддин ҚОДИРОВ, “ҶТ”