Бахшида ба таҷлили Рӯзи ҷаҳонии футбол бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон аксияи ҷумҳуриявӣ таҳти унвони “Тӯби ёдгорӣ - нишонаи ҳамдилӣ” баргузор гардид.

Дар доираи ин иқдоми варзишию фарҳангӣ намояндаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба Роҳбари Хадамоти алоқаи назди Ҳукумати Ҷумҳурии Тоҷикистон - Исфандиёр Саъдулло либоси махсуси варзишӣ, тӯби рамзӣ ва туҳфаи хотиравиро ҳамчун рамзи ҳамбастагӣ, ҷонибдорӣ аз тарзи ҳаёти солим ва саҳмгузорӣ дар рушди фарҳанги варзиш эҳдо намуд.

Инчунин, дар доираи ин иқдоми варзишию фарҳангӣ ба сафири Ҷумҳурии Туркия дар Ҷумҳурии Тоҷикистон Умут Аҷар шарф, ба Роҳбари Намояндагии Созмони Байналмилалии Муҳоҷират дар Ҷумҳурии Тоҷикистон Виктор Лутенко ва ба вазири энергетика ва захираҳои оби Ҷумҳурии Тоҷикистон Далер Ҷумъа тӯби рамзӣ ва туҳфаи хотиравӣ тақдим карда шуданд.

Ҳадафи асосии иқдом таҳкими дӯстиву ҳамбастагӣ, тарғиби тарзи ҳаёти солим ва муаррифии арзишҳои варзишӣ дар ҷомеа арзёбӣ мешавад. Зимни баргузории аксия таъкид гардид, ки чунин ташаббусҳои варзишию фарҳангӣ дар партави сиёсати хирадмандона ва варзишпарваронаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, инчунин дастгириҳои пайвастаи раиси шаҳри Душанбе, президенти Федератсияи футболи Тоҷикистон муҳтарам Рустами Эмомалӣ амалӣ гардида, барои рушди футбол ва таҳкими фарҳанги солимгардонӣ аҳамияти муҳим доранд.

Иштирокдорон иброз доштанд, ки ташаббусҳои байналмилалии Тоҷикистон дар самти рушди футбол ва истифодаи он ҳамчун василаи таҳкими дӯстиву ҳамдигарфаҳмии байни халқҳо аз ҷониби Созмони Милали Муттаҳид ҷонибдорӣ ёфта, барои боло бурдани нуфузи варзиш ва муаррифии шоистаи Тоҷикистон дар арсаи байналмилалӣ заминаи мусоид фароҳам меоранд.
Аксияи “Тӯби ёдгорӣ - нишонаи ҳамдилӣ” дар фазои тантанавӣ ва руҳияи ҳамбастагӣ баргузор гардида, бозгӯи таваҷҷуҳи махсуси давлату Ҳукумат ба рушди соҳаи тарбияи ҷисмонӣ ва варзиш маҳсуб меёбад.

Я. МАҲМАДНАБИЕВ, “ҶТ”