20 май дар варзишгоҳи марказии ноҳияи Нуробод бахшида ба Рӯзи ҷаҳонии футбол фестивали бошукӯҳи футбол баргузор гардид.

Дар чорабинӣ раиси ноҳия Фатҳуддин Солеҳзода, муовинони раис, намояндагони мақомоти ҳифзи ҳуқуқ, ташкилоту муассисаҳо, собиқадорони соҳаи варзиш ва сокинони ноҳия иштирок намуданд.

Зимни суханронӣ раиси ноҳия таъкид кард, ки бо ташаббуси Президенти Ассотсиатсияи футболи Осиёи Марказӣ (CAFA), президенти Федератсияи футболи Тоҷикистон муҳтарам Рустами Эмомалӣ ва қабули қатъномаи махсуси Маҷмаи Умумии Созмони Милали Муттаҳид оид ба расман эълон гардидани 25 май ҳамчун Рӯзи ҷаҳонии футбол, нуфуз ва нақши фаъоли Ҷумҳурии Тоҷикистон дар арсаи байналмилалӣ боз ҳам тақвият ёфт.

Қайд гардид, ки футбол имрӯз на танҳо яке аз варзишҳои маъруфтарин дар ҷаҳон маҳсуб меёбад, балки ҳамчун василаи муҳими тарғиби тарзи ҳаёти солим, рушди ҷисмониву равонӣ ва таҳкими дӯстиву ҳамдигарфаҳмӣ миёни ҷомеа нақши муассир дорад.

Чорабинӣ бо баргузории барномаҳои гуногуни варзишиву фарҳангӣ идома ёфта, кӯдакон, наврасон ва ҷавонони ноҳия маҳорати варзишии худро ба намоиш гузоштанд. Ҳамчунин, дастпарварони муассисаҳои давлатии мактаби варзишии ноҳия таҳти роҳбарии мураббиён ҳунару истеъдоди худро муаррифӣ намуданд.

Дар идомаи фестивал барномаи рангини фарҳангӣ пешниҳоди иштирокчиён гардида, ба чорабинӣ шукуҳу шаҳомати хосса бахшид.

Я. МАҲМАДНАБИЕВ, “ҶТ”