Аз оғози мусобиқаи Ҷоми ҷаҳонии футбол-2026, ки рӯзи 11 июн дар се кишвари мизбон - Иёлоти Муттаҳидаи Амрико, Мексика ва Канада оғоз шуд, то имрӯз марҳилаи гурӯҳии мусобиқа бо суръати баланд идома дошта, аллакай 19 бозӣ баргузор гардидааст.

Дар ин муддат 38 даста вориди майдон шуда, мухлисон шоҳиди рақобатҳои пуршиддат, натиҷаҳои ғайричашмдошт ва як қатор ҳангомаҳо гардиданд. Аз рӯзҳои аввали мусобиқа маълум шуд, ки формати нави Ҷоми ҷаҳон бо иштироки 48 даста рақобатро боз ҳам сангинтар ва пешгӯинашаванда кардааст.

Бозии ифтитоҳӣ миёни мунтахабҳои Мексика ва Африқои Ҷанубӣ баргузор шуд, ки мизбонон бо ҳисоби 2 бар 0 пирӯзӣ ба даст оварданд. Дар дидори дигари ҳамон рӯз мунтахаби Кореяи Ҷанубӣ бар Чехия бо ҳисоби 2:1 дастболо шуд.

Рӯзи дуюми мусобиқа мунтахабҳои Канада ва Босния ва Ҳерсеговина бо ҳисоби 1:1 мусовӣ карданд. Дар ҳамин рӯз мунтахаби Иёлоти Муттаҳида яке аз пирӯзиҳои назаррасро сабт намуда, Парагвайро бо ҳисоби 4:1 шикаст дод.
13 июн рақобати Қатар ва Швейтсария мусови 1:1 анҷом ёфт. Дар бозии дигари рӯз Бразилия, ки аз муддаиёни асосии қаҳрамонӣ маҳсуб мешавад, натавонист Марокашро мағлуб созад ва бо ҳисоби 1:1 бозиро ба анҷом расонд. Ҳамчунин, мунтахаби Шотландия бо ҳисоби минималии 1:0 бар Ҳаитӣ пирӯз шуд.

14 июн яке аз рӯзҳои серголи мусобиқа буд. Австралия бар Туркия бо ҳисоби 2:0 ғолиб омад. Аммо бозии аз ҳама пургол байни Олмон ва Кюрасао баргузор гардид, ки олмониҳо рақибро бо ҳисоби бузурги 7:1 торумор карданд. Ин пирӯзӣ то кунун пурголтарин натиҷаи мусобиқа ба шумор меравад.

Дар бозии дигари рӯз мунтахабҳои Нидерланд ва Ҷопон дар як рақобати диданӣ бо ҳисоби 2:2 мусовӣ карданд. Кот-д’Ивуар бошад, бо ҳисоби 1:0 бар Эквадор ғолиб омад. Ҳамчунин, Шветсия бо бозии ҳуҷумии худ Тунисро бо ҳисоби калони 5:1 шикаст дод.

15 июн чанд натиҷаи ғайричашмдошт сабт шуд. Мунтахаби Испания, ки яке аз фаворитҳои мусобиқа аст, натавонист дарвозаи Кабо-Верде-ро боз кунад ва бозӣ бо ҳисоби 0:0 анҷом ёфт. Ин натиҷа яке аз сенсатсияҳои асосии рӯзҳои аввал арзёбӣ мешавад.

Ҳамчунин, бозии Белгия ва Миср бо ҳисоби 1:1 анҷом ёфт. Арабистони Саудӣ низ муқобили Уругвай мусовии арзишманди 1:1 ба даст овард. Дар бозии охирини рӯз мунтахабҳои Эрон ва Зеландияи Нав рақобати пуршиддат нишон дода, бо ҳисоби 2:2 аз ҳам ҷудо шуданд.

Бозиҳои 16 июн ва субҳи 17 июн бошад, оғози рақобатҳои гурӯҳҳои навро рақам заданд ва фаворитҳои дигар низ ба майдон ворид шуданд. Мунтахаби Фаронса дар нахустин бозии худ муқобили Сенегал бо вуҷуди муқовимати сахти рақиб тавонист пирӯз шавад ва бо ҳисоби 3:1 се имтиёзи муҳим ба даст овард.

Дар бозии дигари гурӯҳ мунтахаби Норвегия бар Ироқ бо ҳисоби 4:1 пирӯз шуд. Ҳамлаҳои тез ва бозии муназзами скандинавҳо ба онҳо имкон дод, ки бозиро зери назорат нигоҳ доранд.

Яке аз бозиҳои пуринтизори рӯз рақобати байни Аргентина ва Алҷазоир буд. Қаҳрамонони Амрикои Ҷанубӣ бо истифода аз таҷриба ва маҳорати инфиродии Месси бозиро таҳти назорат гирифта, бо ҳисоби 3:0 пирӯз шуданд. Ин натиҷа нишон дод, ки аргентинҳо ҳанӯз ҳам аз фаворитҳои ҷиддии қаҳрамонӣ боқӣ мемонанд.

Дар бозии дигари рӯз мунтахабҳои Урдун ва Австрия рақобат намуданд, ки натиҷои рақобат бо ҳисоби 3:1 ба фоидаи мунтаҳаби Австрия ба анҷом расид.

Ҳоло пас аз 19 бозии баргузоршуда дар мусобиқа аллакай 62 гол ба самар расидааст. Ҷоми ҷаҳонии имсола аз рӯзҳои аввал нишон дод, ки дар футболи муосир дигар рақиби осон вуҷуд надорад. Дастаҳои нисбатан заифтар низ муқобили фаворитҳо ҷасурона бозӣ мекунанд. Мусовии Марокаш бо Бразилия, Кабо-Верде бо Испания ва Миср бо Белгия далели равшани ҳамин гуфтаҳост.

Бо идомаи марҳилаи гурӯҳӣ рақобатҳо рӯз аз рӯз ҳассостар мешаванд. Ҳар имтиёз метавонад сарнавишти дастаҳоро муайян кунад ва ҳар иштибоҳ метавонад орзуи идомаи роҳро барбод диҳад. Барои ҳамин, интизор меравад рӯзҳои наздик мухлисон боз шоҳиди бозиҳои драмавӣ ва сенсатсияҳои нав гарданд.

Я. МАҲМАДНАБИЕВ, “ҶТ”