“Орзу - 2026” футболи тоҷикро ба Ҷоми ҷаҳон мебарад

Футболи тоҷик тайи солҳои охир дар натиҷаи ғамхориҳои доимии Президенти Ҷумҳурии Тоҷикистон муҳтарам Эмомалӣ Раҳмон ва пре­зиденти Федератсияи футболи Тоҷикистон муҳтарам Рустами Эмомалӣ ба марҳилаи нави рушд ворид шуда, ба дастовардҳои зиёд ноил гардид. Ҳамин гуна дастгириҳост, ки фут­боли тоҷик солҳои охир дар сатҳи минтақавию байналмилалӣ ба таври шоиста муаррифӣ шуд. Дар сатҳи Осиё аллакай футболи тоҷик дорои дастовардҳои назар­рас мебошад ва ҳадафи масъулин дар солҳои ахир бо барномарезиҳо ин роҳхат ёфтан, ба марҳилаи ниҳоии Ҷоми ҷаҳон оид ба футбол аст. Барои ба Ҷоми ҷаҳон оид ба футбол роҳ ёфтани мунтахаби футболи тоҷик чӣ бояд кард? Чанд соли дигар лозим аст, то мунтаха­би Тоҷикистон ба Чемпи­онати ҷаҳон роҳ ёбад? Вобаста ба дарёфти посухҳои мушаххас ба ин суолҳо ва пурсишҳои ди­гар бо ноиби президенти Федератсияи футболи Тоҷикистон Алишер Уру­нов суҳбат намудем.

– Биёед суҳбатро аз бозии рафиқонаи тимҳои Ҷумҳурии Тоҷикистон ва Федератсияи Русия оид ба футбол оғоз кунем. Феде­ратсияи футболи кишвар пеш аз бозӣ чӣ интизориҳо дошт ва натиҷаи мусовиро чӣ гуна қабул кард?

– Пеш аз ҳама мақсади мо аз баргузории ин вохӯрӣ бар­гузории як иди футбол буд, барои мухлисони азиз. Ба ҳамагон маълум аст, ки дас- таи мунтахаби Русия яке аз дастаҳои пурқувват дар собиқ Иттиҳоди Шуравӣ, Аврупо ва ҷаҳон низ мебошад.

Бо дастае чун мунтаха­би Русия бозӣ кардан, як маҳорати бузургро мехоҳад. Футболбозони мо кӯшишҳои зиёде карданд ва ин ҳис кар­да шуд.

Мо мехостем, ки соли 2022 бозии хотимавӣ боба­рору хотирмон гузарад. Аз ин рӯ, тамоми кӯшишамонро барои хуб гузаштани он раво­на кардем. Аз нуқтаи назари дигар ин бозӣ ҷалб намуда­ни таваҷҷуҳи иловагӣ буд. Аз ҷониби расонаҳои хабарӣ як муддат дар мадди назар қарор доштем, махсусан, сомонаҳои хабарии Русия. Барои тамо­шои ин бозӣ рӯзноманигорони сершумор ва меҳмонони зиёд вориди Душанбе шуданд. Онҳо аз меҳмоннавозию зе­боии Душанбе дар ҳайрат аф­тоданд. Ин мусобиқа на танҳо дар муаррифии футболи тоҷик, балки дар муаррифии ватанамон низ саҳм гузошт.

- Соли 2023 бозиҳои муҳим моро интизор аст, махсусан Ҷоми Осиё. Омодагиҳо чӣ гуна аст ва ба мухлисон чӣ гуфта метаво­нед?

- Бозие, ки дастаи футбо­ли Тоҷикистон бо дастаи Ру­сия доир кард, аллакай яке аз марҳилаҳои аввалин ба­рои омодагӣ ба Ҷоми Осиё аст. Хушбахтона, мо ба ин мусобиқа бори нахуст роҳхат гирифтем. Ҳамин тавр, бозӣ бо дастаи Федератсияи Русия марҳилаи аввали омодагии мо буд. То оғози Ҷоми Осиё – 2023 аз рӯи тақвими Федерат­сияи байналмилалии футбол панҷ марҳила рӯзҳои ФИФА номида мешавад. Рӯзҳои расмие, ки дастаи мунтахаби миллии Тоҷикистон метаво­над бозиҳои расмии рафиқона доир намояд, чӣ дар ҳудуди Тоҷикистон ва чӣ берун аз он. Мо нақшаҳои зиёд дорем ва кӯшишҳои мо дар он аст, ки иштирокамон дар чунин мусобиқот ба ҳукми анъана дарояд ва мо иштирокчии до­имии он бошем.

– Федератсия аз фут­болбозони ҷавон, ки дар дастаҳои берун аз кишвар бозӣ кардаву дар бозиҳои тими миллӣ даъват меша­ванд, розӣ аст?

– Албатта, ҳар варзишгар новобаста аз он ки дар куҷо фаъолият дорад, як муддат маҳорати хуб нишон дода, гоҳо бо сабабҳои гуногун на он қадар бозии хуб нишон дода метавонад. Бояд гуфт, ки ягон футболбоз аз ҳисоби таҷрибаи пештара ё аз ҳисоби бозиҳои қаблие, ки нишон ме­дод, ба дастаи мунтахаб даъ­ват намешавад. Он бозинга­ре, ки дар як муддати муайян пеш аз мусобиқа ба тамрин омода ва маҳорати хоса ни­шон медиҳад, дар ҳамон муд­дат тайёрияш хуб аст, ҳамон ба дастаи мунтахаб даъват мегардад.

Мо умед аз он дорем, ки шумораи футболбозони ҷавони тоҷик, ки дар дастаҳои пурқуввати дигар давлатҳо маҳораташонро сайқал медиҳанд, зиёдтар меша­ванд. Он чиз пӯшида нест, ки ҳар қадар шумори бозингаро­ни хориҷӣ зиёд бошад, ин ба нафъи дастаи мунтахаби мил­лист.

– Айни замон дар сатҳи Осиё бозии кадом мунтаха­би Тоҷикистон, манзур мун­тахаби наврасону ҷавонон ва ё калонсолон, федерат­сияро қаноатманд мекунад?

- Федератсия аз бозии ҳамаи дастаҳо қаноатманд аст. Зеро натиҷаҳое, ки дастаҳои мунтахаби Тоҷикистон дар мавсими соли 2022 нишон доданд, албатта моро қаноатманд намуд. Ҳама роҳхат гирифтанд барои иш­тирок дар мусобиқаҳои бону­фуз, яъне мусобиқоти Осиё. Аз ҷумла, дастаи мунтахаби миллӣ. Лекин ин маънои онро надорад, ки мо аз ҳама чиз қаноатмандем. Он рӯзе, ки дилхоҳ масъул қаноатманд шуд, аллакай он ҷо пешравӣ нест.

– Барои футболи тоҷикро дар майдонҳои ҷаҳонӣ ди­дан, чӣ намерасад? Ё чанд соли дигар лозим аст, то мунтахаби Тоҷикистон ба марҳилаи ниҳоии Чемпио­нати ҷаҳон оид ба футбол роҳ ёбад?

–Бовар кунед, мо ҳам талошманди онем, ки зуд­тар футболи тоҷикро дар майдонҳои ҷаҳонӣ, махсусан дар Ҷоми ҷаҳон бубинем ва умед дорем. Агар умед надош- та бошем, фаъолияту кори ҳамарӯзаву заҳматҳои мо уму­ман маъно надорад. Дилхоҳ масъул, новобаста аз он ки ба кадом кор алоқамандӣ дорад, бояд як нақшаи муайяне дош- та бошад. Ва Федератсияи футболи Тоҷикистон дар назди худ нақша дорад, ки барномаи “Орзу 2026”-ро амалӣ намояд. Хушбахтона, барномаи рушди футбол аз ҷониби Ҳукумати Ҷумҳурии Тоҷикистон қабул шудааст ва яке аз вазифаҳои аввалиндараҷаи мо ин аст, ки ин барномаро амалӣ намоем.

– Барои чӣ барномаро “Орзу - 2026” ном гузоштед?

– Чун федератсия орзу дорад, ки соли 2026 футбо­ли тоҷикро дар Ҷоми ҷаҳон оид ба футбол бинад. То чор соли дигар мо тамоми саъю кӯшиши худро мекунем, то ба ин мусобиқа роҳхат гирем.

– Федератсия мавси­ми гузаштаро бо кадом натиҷаҳо ҷамъбаст кард ва дар мавсими нав мухлисон шоҳиди чӣ навгониҳо шуда метавонанд?

-Федератсияи футболи тоҷик мавсимро бо навгониҳои зиёд ҷамъбаст карда та­вонист. Футболи тоҷик дар солҳои охир нишон медиҳад, ки он дигаргуниҳои назарра­су намоёнро паси сар карда, ба марҳилаи нави рушд ворид шудааст.

Федератсияи футболи Тоҷикистон мавсими нав- ро бо Ҷоми Осиё – 2023, ки яке аз мусобиқаҳои бо­нуфуз аст, оғоз хоҳад кард. Дастаҳои мунтахаби навра­сони то 17–сола ва ҷавонони то 20–сола марҳилаҳои ин­тихобии Чемпионати Оси­ёро бомуваффақият пушти сар карда, соҳиби роҳхат ба марҳилаи ниҳоии мусобиқаҳои мазкур гардиданд. Ба ин тар­тиб, ҳамаи се дастаи мунта­хаби Тоҷикистон – наврасони 17–сола, ҷавонони 20–сола ва тими миллӣ соли 2023 футбо­ли моро дар мусобиқаи Ҷоми Осиё намояндагӣ хоҳанд кард. Ин муваффақият дар таърихи футболи тоҷик бори аввал аст.