Ин нуктаро 9 август Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар нишасти хабарӣ баён дошт.

- Дар натиҷаи тадбирҳои мақсадноки роҳандозишуда ва нақшаҳои мушаххаси корӣ аз ҷониби Кумита дар якҷоягӣ бо дигар сохторҳои дахлдори соҳавӣ, дар нимсолаи якуми соли 2023 сатҳи ҷинояткорӣ дар байни ҷавонону ноболиғон, бекоршавии ақди никоҳ дар байни оилаҳои ҷавонон ва нашъамандию нашъаҷалобӣ ба маротиб коҳиш ёфтааст,-гуфт раиси кумита.

Таъкид гардид, ки мувофиқи маълумотҳои оморӣ давоми нимсолаи якуми соли 2023 дар ҷумҳурӣ аз тарафи ҷавонон ва ё бо иштироки онҳо ҳамагӣ 1713 ҳолати ҷиноят содир карда шудааст, ки нисбат ба нимсолаи якуми соли гузашта (2022-1944) – 231 ҳолат ё 13,4% кам мебошад.
- Дар 6 – моҳи соли 2023 дар миқёси ҷумҳурӣ аз тарафи ноболиғон 258 адад ҷиноят содир гардидааст, ки нисбат ба ҳамин давраи соли 2022 (2022 -431) -173 ҳолат ё 40,1 % камшавии ҷиноят ба қайд гирифта шудааст,-изҳор дошт Абдуллозода.

Инчунин раиси кумита зикр кард, ки дар ҷумҳурӣ давоми нимсолаи якуми соли 2023 мувофиқи маълумотҳои оморӣ 5370 бекоршавии ақди никоҳ ба қайд гирифта шудааст, ки нисбат ба ҳамин давраи соли 2022 1895 ҳолати бекоршавии ақти никоҳ (2022 – 7265) кам аст.
Ҳамзамон, раиси кумита таъкид намуд, ки бо андешидани чораҳои таъсирбахш сатҳи шомилшавии ҷавонон ба ҳар гуна ҳизбу ҳаракатҳои террористиву экстремистӣ ва хатарҳои нави марбут ба ҳизбу ҳаракатҳои мамнуъ ба маротиб коҳиш ёфтааст ва Кумита ҷиҳати пешгирии омилҳои номатлуб дар байни ҷавонон дар нимсолаи якуми соли 2023 низ дар ҳамаи шаҳру ноҳияҳо нақшаву ҷадвалҳои мушаххаси кориро тарҳрезӣ намудааст.

- Ин нишондиҳандаҳо гувоҳи онанд, ки сиёсати давлатии ҷавонон самаранок татбиқ гардида истодааст,-илова намуд ӯ.