19 май дар асоси нақшаи чорабиниҳои муштараки Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Вазорати маориф ва илми Ҷумҳурии Тоҷикистон ва Кумитаи таҳсилоти ибтидоӣ ва миёнаи касбии Ҷумҳурии Тоҷикистон бахшида ба Рӯзи ҷавонони Тоҷикистон дар Донишгоҳи давлатии омӯзгории Тоҷикистон ба номи Садриддин Айнӣ чорабинии маърифатӣ-фарҳангӣ таҳти унвони “Ҷавонон - неруи созанда ва қувваи пешбарандаи имрӯз ва фардои давлат” баргузор гардид.

Тибқи иттилоъ, дар чорабинӣ муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Сураҷ Чоршанбезода, намояндагони бахши кор бо ҷавонон ва варзиши шаҳри Душанбе ва муовинони ректори Донишгоҳ, омӯзгорон ва донишҷӯён иштирок намуданд.

Чорабиниро муовини ректори Донишгоҳи давлатии омӯзгории Тоҷикистон Айнулозода Наҳтуло ифтитоҳ намуда, меҳмононро аз номи роҳбарияти Донишгоҳ хайрамақдам гуфт. Зимни суханронӣ таъкид гардид, ки ҳамасола Рӯзи ҷавонони Тоҷикистон дар фазои сулҳу субот, дӯстӣ, ватандӯстӣ ва худшиносии миллӣ бо баргузории чорабиниҳои гуногуни фарҳангӣ, варзишӣ, илмӣ ва сиёсӣ бо шукуҳу шаҳомати хосса таҷлил мегардад.

Сураҷ Чоршанбезода, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон зимни суханронӣ иброз дошт, ки таҷлили ҳамасолаи Рӯзи ҷавонони Тоҷикистон нишонаи равшани таваҷҷуҳу ғамхории давлату Ҳукумати мамлакат нисбат ба ҷавонон ҳамчун неруи пешбаранда ва ояндасози ҷомеа мебошад. Имрӯз ҷавонон бо донишу ҷаҳонбинӣ, ҳисси баланди ватандӯстӣ ва масъулиятшиносӣ дар рушди тамоми соҳаҳои ҳаёти ҷомеа саҳми арзанда мегузоранд.

Дар идома ба як қатор магистрантон ва донишҷӯёни фаъол барои иштироки намунавӣ дар чорабиниҳои варзишӣ, фарҳангӣ, илмӣ ва сиёсӣ Сипосномаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Вазорати маориф ва илми Ҷумҳурии Тоҷикистон тақдим гардид.

Дар фарҷом аз ҷониби бахши фарҳанги Донишгоҳ барномаи фарҳангӣ-фароғатӣ пешкаши иштирокчиён гардонида шуд.

“ҶТ”