Имрӯз дар Кумитаи миллии олимпии Ҷумҳурии Тоҷикистон бо иштироки Раҳмонзода Абдулло Қурбоналӣ, раиси Кумитаи кор бо ҷавонон ва варзиши назди Ҳукумати кишвар ва роҳбарону намояндагони иттиҳодияҳои ҷамъиятии кор бо ҷавонон мизи мудаввар дар мавзӯи “Нақши иттиҳодияҳои ҷамъиятии кор бо ҷавонон дар раванди маъракаҳои муҳими сиёсӣ” баргузор шуд.

Раҳмонзода Абдулло, раиси кумита зимни суханронӣ изҳор дошт, ки ташкилотҳои кор бо ҷавонон ҳамчун гурӯҳи иҷтимоӣ яке аз роҳҳои амалигардонии ташаббусҳои ҷавонон, воситаи қонеъгардонии талаботи онҳо дар фаъолияти иҷтимоияшон мебошад.

-Ташкилотҳои кор бо ҷавонон дар амалисозии манфиатҳои ҷомеа ва қонеъ гардонидани эҳтиёҷоти гурӯҳҳои мухталифи ҷавонони Тоҷикистон нақши муҳим мебозанд. Ҳадафи фаъолияти ташкилотҳои мазкур дарёфти роҳҳои ҳалли масъалаҳои иҷтимоӣ-иқтисодӣ ва иҷтимоӣ-фарҳангии ин қишри ҷомеа мебошад. Ғайр аз ин, ташкилотҳои кор бо ҷавонон манфиатҳои ҷавононро ҳимоя карда, на танҳо субъектҳои сиёсати дохилии иҷтимоӣ-иқтисодии кишвар мебошанд, балки дар татбиқи сиёсати хориҷии мамлакат низ саҳми арзанда доранд,-афзуд раиси кумита.

Дар идомаи мизи мудаввар раиси кумита бо ҳайати роҳбарон ва намояндагони иттиҳодияҳо дар мавриди фаъолияти анҷомдодаашон дар соли 2019 ва нақшаву ҳадафҳои дар соли 2020 доштаашон суҳбат ороста, таъкид дошт, ки Кумитаи кор бо ҷавонон ва варзиши назди Ҳукумати Ҷумҳурии Тоҷикистон барои дар самти амалӣ гардонидани ҳадафҳо ва нақшаҳои созандаи иттиҳодияҳои мазкур омодааст, дар доираи имкониятҳои мавҷудбуда, ҳама гуна кӯмаку дастгириҳоро расонад ва барои рушди онҳо мусоидат намояд.