Муқаддас Маҳкамзода, хонандаи синфи 3-юми мактаб-интернати шаҳри Истаравшан дар нахустин ҷашнвораи байналмилалии “Шоҳномахонӣ” иштирок намуда, дар бахши “Шоҳномахони ҷавони хориҷӣ” пирӯзӣ ба даст овард.

Дар ин бора Pressa.tj бо истинод ба Сафорати Ҷумҳурии Тоҷикистон дар Ҷумҳурии исломии Эрон хабар дод.

Ба иттилои манбаъ 27 сентябри соли ҷорӣ дар шаҳри Кирмоншоҳи Эрон ин чорабинии байналмиллалӣ ҷамъбаст гардид. Сафири Тоҷикистон дар Эрон Низомиддин Зоҳидӣ дар ҷашнвораи зикршуда, ширкат ва суханронӣ намуд.

Ҷашнвораи мазкур ба хотири беҳтар шиносонидани "Шоҳнома" ба аҳли илму адаб ва дигар қишрҳои ҷомеа роҳандозӣ шуда, ҳадаф аз байналмилалӣ намудани ин ҷашнвора на фақат ба форсзабонҳо балки ба кули ҷаҳон нишон додани шоирони бузург ба мисли Абулқосим Фирдавсӣ маънидод мешавад.

Шаҳодат ХОЛОВА, “ҶТ”