Дар шашмоҳаи аввали соли ҷорӣ воҳидҳои ҳифзи ҳуқуқи Агентии назорати давлатии молиявӣ ва мубориза бо коррупсияи Ҷумҳурии Тоҷикистон 1329 ҷинояти иқтисодии коррупсионӣ ва ҷиноятҳои ба андоз алоқамандро нисбати 724 нафар ошкор намудаанд, ки 516 адади он ба гурӯҳи ҷинояти вазнин шомиланд.

Дар ин бора Сулаймон Султонзода, директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон зимни нишасти ин ниҳод иттилоъ дод.

- Тибқи омори расмии Агентӣ содиршавии ҷиноятҳои хусусияти коррупсионидошта ба мақомоти иҷроияи маҳаллии ҳокимияти давлатӣ - 123 ҷиноят, соҳаҳои маориф ва илм - 116, тандурустӣ ва ҳифзи иҷтимоии аҳолӣ - 70, меҳнат, муҳоҷират ва шуғли аҳолӣ - 18, кишоварзӣ - 17, корхонаҳои идораи замин ва бақайдгирии молу мулки ғайриманқул - 107, шабакаҳои тақсимоту фурӯши барқ - 26, бонкҳои давлатию тиҷоратӣ - 142 ва дигар идораву корхонаҳои давлатӣ - 246 ҷиноят рост меояд,- гуфт С. Султонзода.

Номбурда ҳамчунин қайд кард, ки аз шумораи умумии ҷиноятҳо 210 ададро азонихудкунию исрофкорӣ, 107 ададро тасарруфи пулу моли ба тариқи кредит додашуда ва ғайриқонунӣ додану гирифтани кредит, 48 ададро гирифтану додани пора, ришвадиҳии тиҷоратӣ ва гирифтани мукофот бо роҳи тамаъҷӯӣ, 57 ададро сӯиистифода ва баромадан аз ваколатҳои мансабӣ, 9 ададро қочоқ ва 62 ҷиноят дар соҳаи андоз ва фаъолияти ғайриқонунии соҳибкорӣ ташкил медиҳанд.

Ҳошим РАҲМАТУЛЛОЕВ, “ҶТ”