Дар соли 2025 Бонки миллии Тоҷикистон сиёсати қурбиро дар реҷаи "шинокунандаи танзимшаванда, бе муайян ва эълон кардани ҳудудҳои тағйирёбии қурб" идома дод. Дар ин замина қурби расмии сомонӣ нисбат ба доллари ИМА дар соли ҳисоботӣ ба андозаи 15,4 фоиз устувор гардид.

Дар ин бора Толибзода Фирдавс, раиси Бонки миллии Тоҷикистон имрӯз - 11 феврал зимни нишасти матбуотӣ ба хабарнигорон иттилоъ дод.

Ҳамзамон, қайд гардид, ки бо дарназардошти вазъи иқтисоди ҷаҳон қурби расмии асъори миллии аксари кишварҳои шарики асосии тиҷоратии Ҷумҳурии Тоҷикистон нисбат ба доллари ИМА тағйир ёфтанд. Аз ҷумла, қурби рубли Федератсияи Россия 23,07 фоиз, рубли Белорус 16,43 фоиз, сӯми Ӯзбекистон 6,93 фоиз, тангаи Қазоқистон 4,01 фоиз ва юани Чин 2,22 фоиз устувор гардида, лираи Туркия 21,49 фоиз ва соми Қирғизистон 0,48 фоиз нисбат ба доллари ИМА коҳиш ёфтааст.

Дар мавриди қарзҳои додашуда дар соли 2025 гуфта шуд, ки дар ин давра ҳаҷми чунин қарзҳо 30 млрд сомониро ташкил додааст, ки нисбат ба соли қаблӣ 22,1 фоиз зиёд мебошад. Аз ҳаҷми умумии қарзҳои додашуда 42,6 фоиз ба соҳаи истеъмолот ва 27,4 фоиз ба соҳибкории истеҳсолӣ рост меояд.

Андозаи қарзҳои хурд ва бақияи сандуқи қарзии маҷмуии ташкилотҳои қарзии молиявӣ низ дар ин давра афзоиш ёфтааст.

Шаҳло ЭШОНОВА, “ҶТ”