ИҚТИСОД
Сешанбе 01 Декабр 2020 10:18
7195
-Нақшаи даромади буҷети давлатӣ дар нимсолаи якуми соли 2020 аз ҳисоби ҳамаи манбаъҳои воридот дар сатҳи 95,5 фоиз таъмин гардида, ба буҷет 9,8 млрд сомонӣ ворид гашт, ки ин нисбат ба нақшаи пешбинишуда 462,3 млн сомонӣ кам аст, - гуфт вазири молияи Ҷумҳурии Тоҷикистон Файзиддин Қаҳҳорзода, 29 июл зимни нишасти матбуотӣ.

Номбурда ҳамчунин иброз дошт, ки иҷрои қисми даромади буҷети ҷумҳуриявӣ дар сатҳи 93,3 фоизи нақшаи пебинишуда таъмин гардида, ба буҷет 4,5 млрд сомонӣ ворид шудааст. Ҳаҷми воридоти маблағҳо нисбат ба нақша 331,4 млн сомонӣ кам мебошад. Дар давраи ҳисоботӣ ба буҷетҳои маҳаллӣ 2,7 млрд сомонӣ ворид гардидааст, ки он 98 фоизи нақшаи пешбинишудаи даромадҳоро ташкил медиҳад. Ҳаҷми воридоти маблағҳо нисбат ба нақшаи аниқшуда 55,3 млн сомонӣ ва нисбат ба ҳамин давраи соли сипаришуда 162,3 млн сомонӣ кам аст.

Гуфта шуд, ки дар ин давра аз ҳисоби буҷети давлатӣ барои пардохти музди меҳнати кормандони соҳаҳои буҷетӣ 2,7 млрд сомонӣ, пардохти нафақа 1,3 млрд сомонӣ, идрорпулӣ 32,2 млн сомонӣ, ҷубронпулию кумакпулиҳо 171 млн сомонӣ, бахусус кумакҳои унвонии иҷтимоӣ 16,9 млн сомонӣ маблағгузорӣ гардидааст.

Дар идома таъкид шуд, ки дар моҳҳои январ-июни соли ҷорӣ 16 созишномаи нави қарзию грантӣ барои татбиқи 12 лоиҳаи давлатии сармоягузорӣ ба маблағи 587,2 млн доллари амрикоӣ ба имзо расонида шуд, ки аз он 361,2 млн доллари амрикоӣ маблағи грантӣ, 220 млн доллари амрикоӣ маблағҳои қарзӣ ва 6 млн доллар саҳми Ҳукумати Ҷумҳурии Тоҷикистон мебошад.

Садбарг СУЯРОВА, “ҶТ”

Эзоҳи худро нависед



Рамзҳо дар расм