Рамазон Раҳимзода, вазири корҳои дохилии Ҷумҳурии Тоҷикистон аз бештар шудани ҳолатҳои қаллобӣ дар кишвар изҳори нигаронӣ намуда, гуфт, ки ин навъи ҷиноят дар умум 78 фоизи ҷиноятҳоро ташкил медиҳад. Дар ин бора ӯ имрӯз - 11 феврал дар нишастӣ хабарӣ бо рӯзноманигорон иттилоъ дод.

Ба гуфтаи вазир, соли 2025 дар миқёси ҷумҳурӣ 3448 ҷиноят ба қайд гирифта шудааст. Аз ин шумораи ҷиноятҳо бештар ба қаллобӣ, авбошӣ ва дуздӣ марбутанд.

Ба таъкиди ӯ, сарфи назар аз ин нишондиҳандаҳо, сатҳи умумии ҷинояткорӣ дар Тоҷикистон нисбат ба дигар кишварҳои Иттиҳоди Давлатҳои Мустақил пасттарин арзёбӣ мешавад.
Вазир ҳамчунин иттилоъ дод, ки танҳо аз рӯи ҳолатҳои қаллобӣ 112 ҳолат ба қайд гирифта шуда, беш аз 250 нафар шаҳрвандон дубора ба мақомоти корҳои дохилӣ муроҷиат кардаанд. Ба гуфтаи вазир, ҳолатҳои фиребу қаллобӣ дар бахши сохтмон низ ба назар мерасад.

- Аз ҷумла, баъзе ширкатҳои сохтмонӣ бо роҳи фиреб маблағи шаҳрвандонро гирифта, уҳдадориҳои худро иҷро накардаанд. Ҳамзамон, нигаронии дигар ба қаллобӣ тавассути кортҳои бонкӣ ва ҳамёнҳои электронӣ марбут мебошад, - зикр кард вазир.

Вазири корҳои дохилӣ аз шаҳрвандон даъват кард, ки барои ҳифзи маблағҳои худ рамзҳои махфӣ, аз ҷумла SMS-код ва CVV-рамзро ба ҳеҷ кас пешниҳод накунанд. Ҳамчунин, тавсия дода шуд, ки дар телефонҳо ва ҳамёнҳои электронӣ маблағҳои зиёд нигоҳ дошта нашавад, зеро чунин ҳолатҳо бештар ба қайд гирифта мешаванд.

Фарзонаи УМАРАЛӢ, “ҶТ”