Дар доираи андешидани тадбирҳои дахлдор ҷиҳати таъмини иҷрои саривақтӣ ва пурраи санадҳои судии қабулшуда, дар соли 2025 натиҷаҳои назаррас ба даст омадаанд. Дар ин бора зимни нишасти матбуотии раиси Суди Олии иқтисодии Ҷумҳурии Тоҷикистон Абуллозода Зебониссо иттилоъ дод.

Нобурда зикр намуд, ки дар ҳамкорӣ бо Прокуратураи генералии Ҷумҳурии Тоҷикистон, Хадамоти иҷрои назди Ҳукумати Ҷумҳурии Тоҷикистон, Кумитаи андози назди Ҳукумати Ҷумҳурии Тоҷикистон, ҶСК “Шабакаҳои тақсимоти барқ” ва дигар мақомоти дахлдор, иҷрои санадҳои судӣ вобаста ба рӯёнидани боҷи давлатӣ, маблағҳои зарар ва қарзҳои кредитӣ таъмин гардидааст.

Ба иттилои манбаъ, бо дарназардошти санадҳои судии солҳои қаблӣ ва маблағҳои боҷи давлатии пешпардохтшуда, дар маҷмуъ 371 миллиону 803 ҳазору 297 сомониву 63 дирам ба фоидаи давлат ва дигар тарафҳои манфиатдор рӯёнида шудааст. Ин нишондиҳанда нисбат ба соли 2024 65 миллиону 981 ҳазору 702 сомониву 46 дирам зиёд мебошад, ки аз болоравии самаранокии фаъолияти мақомоти дахлдор дар самти иҷрои санадҳои судӣ гувоҳӣ медиҳад.

Зикр гардид, ки барои таъмини иҷрои саривақтии қарорҳои судӣ чораҳои мушаххаси назоратӣ ва ҳамоҳангсозӣ амалӣ шуда, ҳамкории байниидоравӣ тақвият ёфтааст. Мақомот таъкид карданд, ки иҷрои санадҳои судӣ яке аз унсурҳои муҳими таъмини волоияти қонун, ҳифзи манфиатҳои давлат ва иштирокчиёни муносибатҳои иқтисодӣ ба ҳисоб меравад.

Дар нишаст, ҳамчунин, таъкид шуд, ки Суди Олии иқтисодӣ минбаъд низ фаъолияти худро ҷиҳати баланд бардоштани сатҳи иҷрои қарорҳои судӣ, кам намудани бақияпулиҳо ва тақвияти масъулияти субъектҳои хоҷагидор идома медиҳад.

Ба гуфтаи масъулон, таҳкими назорати иҷрои санадҳои судӣ ва ҳамкории муассир бо сохторҳои марбута имкон медиҳад, ки шаффофият дар муносибатҳои иқтисодӣ таъмин гардида, эътимоди субъектҳои соҳибкорӣ ба низоми судӣ боз ҳам боло равад.

Яҳё МАҲМАДНАБИЕВ, “ҶТ”