Имрӯз, 27 январ, дар Кохи Наврӯз ҷаласаи Шӯрои ҷамъиятии Ҷумҳурии Тоҷикистон баргузор шуд, ки дар он Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон иштирок кард.

Дар ҷаласаи навбатии Шӯрои ҷамъиятии Ҷумҳурии Тоҷикистон, ки таҳти раёсати раиси Шӯро, Президенти Ҷумҳурии Тоҷикистон муҳтарам Эмомалӣ Раҳмон баргузор гардид, роҳбарият ва аъзои фаъоли ҳизбу ҳаракатҳои сиёсӣ, ташкилоту созмонҳо ва иттиҳодияҳои гуногуни ғайридавлатию ҷамъиятӣ, динию фарҳангӣ ва намояндагони воситаҳои ахбори умум ширкат карданд.



Ҳоло дар мамлакат 7 ҳизби сиёсӣ ва қариб дуюним ҳазор созмони ҷамъиятӣ бо дархосту пешниҳодҳои созандаи худ таъсиргузор буда, онҳо дар доираи талаботи оинномавии худ ба хотири пешрафти соҳаҳои гуногуни сиёсиву иқтисодӣ ва иҷтимоиву фарҳангии мамлакат саъю талош мекунанд.

Сарвари давлат, Раиси Шӯрои ҷамъиятии Ҷумҳурии Тоҷикистон, муҳтарам Эмомалӣ Раҳмон дар суханронии худ ба нақши Шӯрои ҷамъиятӣ дар ҳалли муҳимтарин масъалаҳои ҳаёти ҷомеа баҳои баланд дода, таъкид намуд, ки қарорҳои дар ҷаласаҳои шӯро қабулшуда дар даврони соҳибистиқлолӣ барои ба эътидол овардани вазъи ҷомеа, ваҳдати миллӣ, суботи комили сиёсӣ таъмини сулҳу амният, ташаккули ҷомеаи шаҳрвандӣ, озодии сухан ва муколамаи сиёсӣ заминаҳои воқеӣ фароҳам оварданд.



Ба андешаи Президенти мамлакат, дар давоми бист соли фаъолият Шӯрои ҷамъиятӣ муколамаи байни мақомоти ҳокимияти давлатӣ ва ҷомеаи шаҳрвандӣ, ҳизбҳои сиёсӣ, иттиҳодияҳои ҷамъиятӣ, созмонҳои ғайриҳукуматӣ, иттифоқҳои эҷодӣ, ташкилотҳои динӣ, ҷамъиятҳои милливу фарҳангӣ ва дигар иттиҳодияҳои ҷамъиятиро таъмин намуд ва ба таҳкими пояҳои ваҳдати миллӣ кӯмак расонида вазифаҳои таърихии худро иҷро кард.

​Нақши Шӯрои ҷамъиятӣ, ҳамчунин дар раванди амалӣ гардидани се ҳадафи стратегии давлат – таъмини истиқлолияти энергетикӣ, раҳоӣ аз бунбасти коммуникатсионӣ ва ҳифзи амнияти озуқаворӣ тавассути корҳои ташвиқотӣ ва фаҳмондадиҳӣ бузург арзёбӣ гардида, изҳори итминон карда шуд, ки ибтикороти созмонҳои ғайриҳукуматӣ ва иттиҳодияҳои истеҳсолии соҳибкорони хурду миёна ба хотири амалӣ шудани ҳадафҳои созандаи Ҳукумати Ҷумҳурии Тоҷикистон минбаъд низ идома меёбад.

Дар суханронии худ Пешвои миллат, муҳтарам Эмомалӣ Раҳмон аз вазъи ниҳоят печидаву мураккаби ҷаҳони имрӯза, аз қабили зуҳуроти номатлуби коррупсия ва афзоиши хатари терроризму ифротгароӣ ёдовар шуда, таъкид намуд, ки мубориза ба муқобили ин хатарҳо на танҳо вазифаи давлат ва Ҳукумат аст, балки дар пешгирии ин зуҳурот тамоми ҳизбҳои сиёсӣ, ҳаракатҳои ҷамъиятӣ ва иттиҳодияву созмонҳои ғайриҳукуматӣ бояд фаъол бошанд.

Тавре таъкид гардид, дар ҷаласаҳои Шӯрои ҷамъиятӣ маротибаҳои зиёд ба нақши ҷавонон дар ташаккули ҷомеаи шаҳрвандӣ афзалияти бештар дода шуда, давлату Ҳукумати Ҷумҳурии Тоҷикистон аз насли ҷавон ва ояндасоз эътимоди бузург дорад ва ҳар як ташаббуси созандаи онҳоро дастгирӣ менамояд. Бо назардошти ин аз аъзои Шӯрои ҷамъиятӣ талаб карда шуд, ки дар баробари мақомоти давлатӣ барои ҷалби ҷавонон дар корҳои созандагиву ободкорӣ нақши фаъол гузошта, дар пешгирӣ намудани паҳншавии бегонапарастиву хурофот ва экстремизму терроризм дар байни ҷавонон саҳми муносиб гузоранд.

Баъди анҷоми суханронии Раиси Шӯрои ҷамъиятӣ, Сарвари давлат, муҳтарам Эмомалӣ Раҳмон аъзои Шӯрои ҷамъиятӣ доир ба паҳлӯҳои гуногуни рушду тараққиёти минбаъдаи Тоҷикистони соҳибистиқлол дар партави сиёсати башардӯстонаи Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон фикру мулоҳизаҳои судманд ва андешаҳои ҷолиб баён доштанд. Дар муҳокимаи масоили муҳими рӯзномаи ҷаласаи шӯро роҳбарони ҳизбу иттиҳодияҳои ҷамъиятӣ ва дигар аъзои шӯро фаъолона иштирок намуданд.