Имрӯз, 23 сентябр, дар Маркази тадқиқоти стратегии назди Президенти Ҷумҳурии Тоҷикистон якҷо бо Ҳаракати ҷамъиятии «Друзя России» («Дӯстони Русия») дар мавзӯи «Таҳдиду хатарҳои нав аз тарафи ДИИШ барои кишварҳои минтақаи Осиёи Марказӣ» суҳбати гирди миз баргузор шуд.

Дар он коршиносони мустақил, намояндагони гурӯҳҳои ҷамъиятӣ, кормандони вазорату идораҳои дахлдор, инчунин, намояндагони корпуси дипломатӣ ширкат варзиданд.

Иштироккунандагон қайд карданд, ки терроризми байналмилалии муосир ва экстремизми динӣ ба проблемаи глобалии хатарноки муосир табдил ёфтааст ва ба амнияти ҷомеаи ҷаҳонӣ таҳдид мекунад. Дар рафти муҳокима ба масъалаи фаъолияти мақомоти ҳифзи ҳуқуқ дар соҳаи мубориза ва пешгирии ҷиноятҳои вобаста ба терроризм ва экстремизм, таваҷҷуҳи зиёд зоҳир карда шуд.
Чунончи, намояндаи Вазорати корҳои дохилии Ҷумҳурии Тоҷикистон диққати ҳозиринро ба нақши технологияҳои иттилоотию коммуникатсионӣ, ки аз тарафи экстремистон фаъолона бо мақсади ҷалби ҷавонон истифода мешавад, ҷалб намуд. Вазъияти ҳарбию низомӣ дар кишварҳои Шарқи Наздик низ мавриди мубоҳисаи коршиносон қарор гирифт. Аз тарафи онҳо сенарияҳои эҳтимолии рушди вазъият дар Сурия, Ироқ ва Афғонистон дар робита ба ҳамкориҳои ҷомеаи ҷаҳонӣ дар мубориза алайҳи ДИИШ пешгӯӣ карда шуд.

Қайд гардид, ки Ҷумҳурии Тоҷикистон яке аз иштироккунандагони фаъоли мубориза алайҳи таҳдиду хатарҳои нав, ба монанди экстремизм ва терроризми байналмилалӣ мебошад.