Имрӯз 10-апрел, дар маҳаллаи Гагарини шаҳри Душанбе, бо ташаббуси Донишкадаи тарбияи ҷисмонии Тоҷикистон ба номи С.Раҳимов дар якҷоягӣ бо Кумитаи ҷавонон, варзиш ва сайёҳӣ бо мақсади ободонию сарсабзнамоии пойтахти ҷумҳурӣ маъракаи кабудизоркунию ниҳолшинонӣ доир гардид.

Дар чорабинии мазкур омӯзгорону донишҷӯёни Донишкадаи тарбияи ҷисмонии Тоҷикистон дар ободу зебо гардондани ин гӯшаи шаҳри Душанбе фаъолона ширкат варзиданд. Онҳо сангрезаву решаи ҳар гуна дарахтонро бартараф карда, ниҳолҳои сояафкану ороишӣ шинонданд.

“ –Бо қарори Ҳукумати шаҳри Душанбе 150 рӯзи ободонию созандагӣ ва ниҳолшинонию кабудизоркунӣ эълон шудааст. Ҳамаи устодону донишҷӯёни Донишкадаи тарбияи ҷисмонии Тоҷикистон барои фаъолона иштирок намудан, дар ин чорабиниҳо саҳми худро гузошта истодаанд. Ба донишкада мавзеъи кӯчаи Гагарин ва кӯчаи Ҳофизи Шерозӣ вобаста карда шудааст, ки мудати як моҳ аст, донишҷӯёну омӯзгорон ба сарсабзу хуррамгардонидани мавзеъҳои мазкур машғуланд. Дар ин мудат аҳли донишкада кушиш ба харҷ доданд, ки қариб беш аз ҳазор ниҳоли арча ва зиёда аз ду ҳазор гулҳои гуногунро шинонанду барои тоза нигоҳ доштани мавзеъҳои номбурда ҳиссаи худро гузоранд. Дар маъракаи ободию кабудизоркунӣ беш аз се ҳазор донишҷӯён аз ибтидо то инҷониб иштирок намуданд”, - иброз дошт Мирзобоқӣ Шарипов, ноиби ректори Донишкадаи тарбияи ҷисмонии Тоҷикистон.  

Дар чорабинии имрӯза беш аз 500 нафар донишҷӯён иштирок намуда, саҳми худро дар ободкорӣ ва сарсабзу хуррамгардонии пойтахти кишвар, шаҳри Душанбе гузоштанд.    
                                                                                                          
Беҳрӯз ХОЛМУРОДОВ, “ҶТ”