Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон бо як муроҷиатнома аз сокинон ва меҳмонони ҷумҳурӣ хостааст, ҳангоми сафар ба навоҳии кӯҳӣ дар ин рӯзҳо, ки хатари лағжиши тарма ва яхбандии роҳҳо хеле зиёд аст, аз эҳтиёт кор гиранд.

Кумита дар муроҷиатномаи худ бо истинод ба маълумоти Агентии ҳавошиносии кишвар гуфтааст, ки дар роҳҳои мошингарди Душанбе – Хуҷанд, Душанбе - Рашт, Душанбе - Сангвор, Душанбе - Лахш, Кӯлоб - Дарвоз, Ванҷ - Хоруғ, Хоруғ - Ишкошим, Хоруғ – Мурғоб хатари лағзиши тарма вуҷуд дорад.

“Аз ин рӯ сокинону меҳмонони кишварро зарур аст, ки дар ин рӯзҳои сард аз рафтан ба қитъаҳои хатарноку осебпазир худдорӣ намоянд ва дар ҳолати зарур будан ба сафар ронандагон бояд мошини худро аз назар гузаронида, чархҳои фарсударо бо нав иваз кунанд”-омадааст, дар муроҷиатнома.

Ҳамчунин таъкид шудааст, ки дар натиҷаи гармии рӯзона барфҳо об шуда, ҳангоми сардии шаб боиси яхбандӣ дар роҳҳо мегардад.

Таҳмина ЮСУФӢ, “ҶТ”