НБО-и “Роғун” яке аз бузургтарин иншоотҳое мебошад, ки дар даврони истиқлолият сохтмони он дубора оғоз гардид ва имрӯз бо ба кор пардохтани чанд агрегат саҳми он дар таъмини амнияти энергетикии кишвар бузург аст. Имрӯзҳо номи “Роғун” вирди забони мардуми на танҳо Тоҷикистон, балки Осиёи Миёна ва ҳатто ҷаҳон гаштааст. Дар зимн назари чанде аз ҷавонони касбу кори гуногунро доир ба аҳамияти “Роғун” дар таъмини амнияти энергетикии Тоҷикистон ва Осиёи Миёна пурсон гардидем.

Насим ХОҶАЕВ, саромӯзгори кафедраи “Системаи компютерӣ ва ҳифзи иттилоот”-и Донишгоҳи давлатии Данғара:

- Неругоҳи барқи обии “Роғун” яке аз иншоотҳои бузурги энергетикии Тоҷикистон мебошад, ки ояндаи наздик дар кишварамон истиқлолияти комили энергетикиро таъмин менамояд ва он дар ҷаҳон яке аз пуриқтидортарин иншоотҳо ба ҳисоб меравад. Ин манбаи нур яке аз объектҳои стратегӣ ва асосии миллати тоҷик мебошад. Туфайли ба кор даромадани ду агрегати ин неругоҳ мамлакати мо аз буҳрони энергетикӣ раҳоӣ ёфт. Садҳо корхонаи истеҳсолӣ бун-ёд гардид. Рӯзгори мардум рӯ ба беҳбудӣ овард, ки ин ҳама самараи заҳматҳои Пешвои миллат ва баракати Истиқлолияти кишвари азизамон мебошад. НБО “Роғун” бо ин ҳама шукуҳу шаҳомате, ки дорад, на танҳо дар Тоҷикистон, инчунин дар Осиёи Миёна яке аз иншоотҳои муҳим ва зарурӣ ба ҳисоб меравад.

Муҳаммад АМИНЗОД, ассистенти кафедраи журналистикаи байналхалқии факултети журналистикаи ДМТ:

-Ҷумҳурии Тоҷикистон баъди ба даст овардани Истиқлолияти давлатӣ ба дастовардҳо ва музаффариятҳои зиëде ноил гардид. Дар ин давра яке аз самтҳои асосии сиёсати пешгирифтаи Ҳукумати кишвар ин ба даст овардани истиқлолияти энергетикӣ мебошад.

Тайи чандин даҳсолаҳо бартараф намудани мушкилоти аҳолӣ аз норасоии қувваи барқ ва таъмини истиқлолияти энергетикӣ дар кишвар яке аз ҳадафҳои асосии Сарвари давлат муҳтарам Эмомалӣ Раҳмон буд.

Имрӯз аксарияти кишварҳои ҷаҳон дар минтақаи Осиёи Миёна, Тоҷикистонро ҳамчун кишвари энергетикӣ эътироф мекунанд.

Як нуктаи муҳимро бояд гуфт, ки бунёди мукаммали он на танҳо барои Тоҷикистон, балки барои кулли минтақаи Осиёи Марказӣ зарур аст. Баъди ба итмом расонидани корҳои сохтмонии ин неругоҳи бузург ҳаҷми солонаи истеҳсоли қувваи барқ дар кишвар афзоиш ëфта, на танҳо аҳолии кишвар пурра бо барқ таъмин мешавад, балки мо метавонем, ҳамсоякишварҳои минтақаи Осиëи Миёнаро ба қувваи барқ таъмин созем. “Роғун” бо бузургӣ ва шаҳомати худ метавонад, амнияти энергетикии минтақаи Осиëи Миёнаро таъмин созад.

Муҳаммад СУБҲОНЗОДА, донишҷӯи ДМТ:

-Яке аз бузургтарин дастовардҳои дар даврони истиқлол бадастомада, ин сохтмони НБО-и “Роғун” мебошад. “Роғун”-ро ҳамчун кафили соҳибиқтидори амнияти энергетикӣ дар минтақа ва ҷаҳон метавон номид. Он аз 6 агрегат иборат аст, ки баъди ба истифода додани ҳамаи он солона 17 миллиард квт/соат барқ тавлид хоҳад кард ва ҳамин аст, ки онро манбаи равшанӣ номидаанд.

Қадриддини СУҲРОБ, донишҷӯи ДДОТ ба номи С.Айнӣ:

-Дар ҳақиқат, НБО-и “Роғун” дар таъмин намудани энергияи сабз на танҳо дар кишварамон, балки дар минтақа саҳми назаррас дорад. Баъди ба кор шуруъ намудани тамоми агрегатҳо кишвари мо дар Осиёи Марказӣ яке аз давлатҳои асосии тавлидгари энергияи сабзи аз ҷиҳати экологӣ тоза дониста хоҳад шуд.

Ҳошим РАҲМАТУЛЛОЕВ, “ҶТ”