Санаи 3 майи соли равон дар меҳмонхонаи "Ҳайят Реҷенси"-и шаҳри Душанбе Конференсияи байналмилалӣ бахшида ба "Рӯзи озодии баён" дар мавзӯи "Озодии сухан: Имкониятҳо ва дурнамо дар минтақа" баргузор гардид.

Дар он Раҳмонзода Абдуҷаббор Азиз - ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, Туула Юрёля - роҳбари Идораи барномаҳои САҲА дар Душанбе, Ҳенри Эншер - муовини ёрдамчии Котиби давлатии ИМА, Хидайет Бишчевич - роҳбари намояндагии ИА дар Тоҷикистон, Хю Стенли Филпотт - Сафири фавқулода ва мухтори Британияи Кабир дар Тоҷикистон иштирок ва суханронӣ намуданд.

Дар кори конференсия рӯзноманигорон аз ҷумҳуриҳои Қазоқистон, Ӯзбекистон, Қирғизистон ва Тоҷикистон ширкат варзида, доир ба вазъи озодии матбуот дар минтақа изҳори ақида намуданд. Таъкид гардид, ки дар инъикоси масоили мубрами ҷомеа ва таъсири он ба вазъи кунунии сиёсиву иқтисодии кишварҳои минтақа нақши рӯзноманигорон хеле бориз аст.

Барои саҳми арзанда дар рушду инкишофи журналистикаи касбӣ як қатор рӯзноманигорон бо унвонҳои фахрии соҳа сарфароз гардонида шуданд. Аз ҷумла, ба Нуралӣ Давлат ҷоизаи "Эътимод", Саидэҳсони Ҷалолиён (Радиои Имрӯз) - ҷоизаи "Ҷасорати журналистӣ", Раҷаби Мирзо – ҷоизаи "Касбияти журналистӣ", Хуршеди Андам – ҷоизаи "Ҳамраъйии касбӣ", Носирҷон Маъмурзода ва Абдуқодир Талбаков - ҷоизаи Пайванд Гулмуродзода дар бахши илм ва фарҳанг, Завқибек Саидаминӣ, Саидраҳмон Назриев ва Зокир Ҳасан – ҷоизаи "Тадқиқоти журналистӣ" дар соҳаи ТВ ва бахши матбуот тақдим карда шуд.