МУАЛЛИФ: ҲАСАН АЗИЗОВ

Дар “Душанбе Плаза” Шарҳи якҷояи соли шашуми татбиқи «Стратегияи миллии солимии аҳолии Ҷумҳурии Тоҷикистон барои солҳои 2010-2020» баргузор гардид.

Насим Олимзода, вазири тандурустӣ ва ҳифзи иҷтимоии аҳолии Тоҷикистон, иброз дошт: “Соҳаи тандурустӣ ва ҳифзи иҷтимоии аҳолӣ яке аз самтҳои афзалиятноки сиёсати Ҳукумати Тоҷикистон ба шумор рафта, тайи солҳои охир ба дастовардҳои назаррас ноил гардидааст. Ислоҳоти сохтори идоракунии тандурустӣ, хизматрасониҳои тиббӣ, амнияти санитарию эпидемиологӣ ва дигар самтҳои ҳифзи солимии аҳолӣ ба тақвият бахшидани ҳамоҳангсозӣ ва таъмини низоми он нигаронида шудааст. Фаъолияти соҳаи тандурустии кишвар дар сатҳи ислоҳоти соҳа, дастрасӣ ва беҳтар намудани сатҳи хизматрасониҳои тиббӣ ба аҳолӣ, алалхусус дар сатҳи кӯмаки аввалияи тиббию санитарӣ ва ворид намудани тибби оилавӣ, ворид намудани усулҳои муосири ташхису табобат, рушди тибби хусусӣ нишон медиҳад, ки дар солҳои охир корҳои зиёди натиҷабахш ба анҷом расонида шудаанд. Ҳамаи ин корҳо дар доираи “Стратегияи миллии солимии аҳолии Ҷумҳурии Тоҷикистон барои солҳои 2010-2020” амалӣ гардидаанд. Бовар дорам, ки ҷаласаи мазкур барои ноил гардидан ба дастовардҳои нав ва ҳамкории судманд мусоидат мекунад”.

Гуфта шуд, ки тибқи Қарори Ҳукумати Тоҷикистон аз 1 августи соли 2010 «Стратегияи миллии солимии аҳолии Ҷумҳурии Тоҷикистон барои солҳои 2010-2020» қабул гардид, ки яке аз самтҳои асосии муайянкунадаи соҳаи тандурустӣ мебошад. Он дар чор самт: хизматрасонии тиббӣ, захираҳои инсонӣ, маблағгузорӣ ва идоракунии тандурустӣ равона шуда, ҳар сол дар якҷоягӣ бо мақомоти маҳаллӣ, ташкилотҳои байналмилалӣ, кормандони соҳа ҷамъбаст гардида, пешниҳод, мушкилот ва роҳи ҳалли онҳо дар ҳамин ҷаласа баррасӣ мешаванд.

Шералӣ Раҳматуллоев, сардори Раёсати ташкили хизматрасониҳои тиббӣ ба модарону кӯдакон ва танзими оилаи Вазорати тандурустӣ ва ҳифзи иҷтимоии аҳолӣ иброз дошт, ки қабули стратегияи мазкур барои рушди соҳаи тандурустӣ ҳамчун як ҳуҷҷати ҳуқуқии меъёрӣ, яъне як раҳнамо зарур буд. То соли 2010 як қатор барномаҳо, стратегияҳои алоҳида нисбат ба ин ё он самти фаъолияти вазорат қабул гардида буданд. Зарурат пайдо шуд, ки ҳамаи он барномаҳоро дар як стратегияи муайян ҷой дода, нақшаи ояндаи 10 соли фаъолияти вазоратро муайян созад. Чор самте, ки дар стратегия дарҷ шудааст, самтҳои афзалиятноки соҳа ба ҳисоб мераванд.

“Яке аз маҳаки асосие, ки дар стратегия омадааст, паст кардани фавти модарону кӯдакон мебошад. Вобаста ба ин самт мо бақайдгирии саривақтии занони ҳомиларо зиёд намудем, дастрасии маводҳои контрасевтивиро ба занҳо бештар кардем, чунки ин яке аз масъалаҳои танзими оила мебошад. Ҳамаи ин ба он оварда расонд, ки сол ба сол фавти модару кӯдак дар кишвар кам гашта истодааст. Масалан соли 2016 фавти модарон 1,8 маротиба ва фавти кӯдакон 2,7 маротиба паст гардид. Сол ба сол маблағгузорӣ ба соҳаи тандурустӣ зиёд шуда истодааст. Дар муассисаҳои табобатӣ, чи кӯмаки аввалияи тиббиву санитарӣ ва чи госпиталӣ зиёда аз 25 маротиба зиёд гардидааст. Солҳои пеш барои як компютери тамограмма кардан мо табибон беморро ба давлатҳои ҳамсоя ё аз он дур мефиристодем. Имрӯз, хушбахтона дар ҷумҳурӣ зиёда аз 30 компютери тамограмма ҳаст. Дар тамоми минтақаҳои ҷумҳурӣ дастрасии аҳолӣ ба хизматрасониҳои тиббӣ хеле беҳтар шудааст. Имрӯз шумораи шахсоне, ки барои табобат ба хориҷи кишвар мераванд, ангуштшумор мондаанд”, - гуфт Ш. Раҳматуллоев.

Гуфта шуд, ки рӯзҳои наздик бо дастгири Ҳукумати ҷумҳурӣ як озмоишгоҳи реферивӣ дар назди Вазорати тандурустӣ ва ҳифзи иҷтимоии аҳолӣ (Маркази милли тиббӣ) ба истифода дода мешавад, ки тамоми сатҳу сифати ташхисҳое, ки дар дигар озмоишгоҳҳои ҷумҳурӣ мегузаранд, дар ин ҷо натиҷабарорӣ мешавад.

Ҳамзамон дар рафти ҳамоиш дастовардҳои умумӣ ва мушкилоти татбиқи «Стратегияи миллии солимии аҳолии Ҷумҳурии Тоҷикистон барои солҳои 2010-2020» ва саҳми шарикони рушд мавриди баррасӣ қарор гирифт.