Як гурӯҳи калони ходимони фарҳангӣ ва хабарнигорони Ҷумҳурии Ӯзбекистон, ба сафари корӣ ба кишвари мо ташриф овардаанд. Дар ин замина, дар Академияи ВАО-и кишвар вохӯрии хабарнигорни тоҷик бо ҳамтоёни ӯзбеки худ доир гардид.

Ҳамкасбони тоҷик, аз ҷумла раиси Академияи ВАО-и кишвар Зиннатулло Исмоилзода ва дигарон меҳмононро хайра мақдам гуфтанд. Дар ин вохӯрӣ аз ҷониби Ӯзбекистон Шарофат Эрматова, роҳбари Маркази фарҳангии миллии тоҷикони Ӯзбекистон “Ориёно”, муовини сармуҳарри рӯзномаи “Овози тоҷик” Тоҷибой Икромов, шоир, профессори Донишгоҳи давлатии Самарқанд Ҷумъа Ҳамроев ва дигарон ширкат ва сухан гуфтанд.

Ҳадаф аз сафари меҳмонон омодасозии маводҳо дар арафаи сафари расмии Президенти Тоҷикистон Эмомалӣ Раҳмон ба Ӯзбекистон, рушди муносибатҳои байнидавлатӣ, тарғиби анъанаҳои миллии ҳар ду халқҳои ҳамсоя, шиносоӣ бо шароити зист ва рӯзгори мардуми тоҷику ӯзбек дар манотиқи Суғду Хатлон ва шаҳри Душанбе мебошад.