Аз нимаи асри ХХ сар карда, дунёи варзишро намуди нави муҳориба бо номи таэквондо ҷолибу диданӣ гардонидааст. Решаҳои пайдоиши ин намуди варзишро ба давлати Корея мансуб медонанд. Тахмин мезананд, ки дар замони се давлат санъатҳои муҳорибавӣ, аз қабили “субак” ва “таэккён” пеш аз асри XIV ба вуҷуд омадаанд, ки баъдан ба заминагузории рушди таэквондо таъсир гузоштаанд.

Дар зимн бо Муниса Ойматова, устоди варзиши дараҷаи байналмилалӣ, беҳтарин варзишгарбонуи соли 2020-и Тоҷикистон, дорандаи медали тиллои мусобиқаи рейтингии “Fujaira Open G2” ва дорандаи роҳхат ба мусобиқаи интихобии Осиё суҳбат намудем.

- Пеш аз ҳама Шуморо барои ғолиб омадан дар номинатсияи “Варзишгари беҳтарин байни бонувон дар соли 2020” табрик мегӯям. Таассуроти шумо чӣ гуна буд?

- Ростӣ, нафарони масъул як рӯз пеш аз баргузории чорабинӣ маро огаҳ карда буданд, ки маросими ҷоизасупории соҳаи кор бо ҷавонон ва варзиш дар соли 2020 доир мегардад ва ман низ дар қатори дигар варзишгарон бояд иштирок дошта бошам. Аз чунин дастоварди бузург ҳатто хабар надоштам ва мисли ҳамагон дар саҳна барои ҷоизаҳои беҳтаринҳо кафкӯбӣ мекардам. Чун пас аз эълони номинатсияи мазкур номи маро хонданд, ба шунидани номи худ бовар надоштам, ки миёни ин ҳама бонувони варзишгар дар мамлакат ман сазовори чунин ҷоизаи бузург гардидам. Воқеан, бароям армуғон буд.

Дар ин росто мехоҳам миннатдории самимии худро ба Ҳукумати мамлакат ва раиси Кумитаи кор бо ҷавонон ва варзиш муҳтарам Абдулло Раҳмонзода, ҷиҳати чунин дастгириҳову ҷоизаҳои баланд ва хусусан ба устодам Шамсулло Қодиров бирасонам.

- Сабаби маҳз варзиши таэквондоро интихоб намуданатон дар чист?

- Албатта, барои иҷрои ҳар амал ва ё кӣ будану кӣ шудан дар ҳаёт нафаре таъсиргузор мешавад. Соли 2016 буд. Варзишгар шудан ҳатто дар гӯшаи хаёлам набуд. Дугонаҳоям Нозанин ва Маҳина дар ин намуди варзиш назди Шамсулло Қодиров, устоди шоистаи варзиши ҷумҳурӣ тамрин мегирифтанд. Рӯзе бо хоҳиши зиёди онҳо ба толори варзишиашон рафтам. Ҳаракатҳо, либосҳои дар аввал барои ман шавқовар, зарбаҳои ҷолибу диданӣ ва он ҳама ҷолибиятҳои ин намуди варзиш маро якбора тобеи худ кард ва шавқи варзишгар шуданро дар дилам бедор намуд. Бешак, метавон гуфт, ки интихоби варзиш барои ман як чизи тасодуфӣ буд.

- Аввалин мусобиқаи иштирокнамудаатон дар куҷо буд ва аз он чӣ хотироте доред?

- Пас аз се-чор моҳи тамрин якбора дар мусобиқаи ҷумҳуриявӣ иштирок намудан ва сазовори ҷойи аввал гардидан тасодуфӣ нест ва албатта бе хотирот низ намешавад. Чун бори аввал ба майдони набард баромадам, ҳиссиёти аҷибу эҳсоси ногувори тарс вуҷудамро забт карда буд. То он даме, ки якчанд зарба аз рақиб нахӯрдам, ба худ наомадам. Фикр мекардам, дасту поям баста буд ва дар ниҳоят баъди дақиқаҳои аввал, ки аз усулҳои омӯхтаам кор гирифтам, майдондор шудам ва дилпурона зарба задам. Бо ҳамин услуб бори аввал дар вазни 41 кг дар ҳаёти варзишии худ қаҳрамони Тоҷикистон аз намуди таэквондо ВТФ миёни наврасон гардидам. Хотирмонтарин лаҳза бароям он замон ба гардан овехтани медали тиллои мусобиқа буд.

- Ғайр аз варзиш боз ягон шуғли дигар доред?

- Зан бояд ҳунарманд ва пеш аз ҳама кадбонуи хуб бошад. Ба варзиш рӯ оварданам маънои онро надорад, ки дигар ба чизе майл надораму пайи кори дигаре намегардам. Ман варзишро ҳамчун сарчашмаи саломатӣ ва касб барои ояндаи хеш интихоб намудаам. Пухтани таомҳои миллиро бисёр меписандам. Гарчанде ки бештари вақти худро ба омӯзиш ва тамрини варзиш мегузаронам, боз ба хондани китобҳои бадеӣ низ завқ дошта, забонҳои хориҷиро низ меомӯзам.

- То имрӯз дар кадом мусобиқаҳои байналмилалӣ иштирок намудаед ва аз ҳама ҷолиб бароятон кадомашро медонед?

- Аз соли 2018 инҷониб иштирокчии мусобиқаҳои байналмилалӣ мебошам. Чаҳор соле, ки аз ҳаёти варзишиам сипарӣ гардид, пур аз муваффақиятҳо буд. Аз ҷумла, моҳи сентябри соли 2019 дар шаҳри Бейрути Ҷумҳурии Лубнон дар мусобиқаи “G1 Beirut Open 2019” иштирок доштам ва хушбахтона дар ин сабқат низ медали тиллои мусобиқаро ба даст овардам.

Аз ҳама мусобиқаи ҷолибу пурташвиш бароям мусобиқаи рейтингии “Fujairah Open G2” мебошад, ки дар Аморати Муттаҳидаи Араб баргузор шуда буд. Мусобиқа аз рӯйи шакли баргузориаш мавқеи баландро соҳиб аст, зеро рейтинги бадастоварда имконият барои роҳхатгирӣ ба Бозиҳои олимпӣ аст. Дар мусобиқа намояндагони 44 давлати ҷаҳон иштирок доштанд. Барои мағлуб гардиданам ҳамагӣ 6 сония боқӣ монда буд ва эҳтимол буд, ки аз медали тилло маҳрум гардам. Чуноне, ки мегӯянд, “Фурсати бурд ғанимат”. Дар охирин лаҳза зарбаи ҳалкунандаро ба рӯйи ҳариф задам ва қувваҳо баробар шуданд. Бароямон вақти иловагӣ ҷудо гардид. Чунон дар ҳаяҷон қарор доштам, ки ашки чашмонам беист мерехт. Дар ниҳоят вақти изофӣ низ ба поён расид. Ҳарду мунтазири номи ғолиб будем. Интихоби ғолиб то дараҷае мушкил гардид, ки сардовари мусобиқаро даъват карданд ва баъди хулосабарориҳои зиёд ғолибият насиби ман гардид. Ин ғалабаро бузургтарин хушбахтӣ дар ҳаёти худ медонам.

- Сирри муваффақиятҳои худро дар чӣ мебинед?

- Агар дар тамоми лаҳзаҳои зиндагӣ ба худ боварӣ дошта бошем ва барои иҷрои ҳар амаламон устуворона қадам бимонем, албатта муваффақ мешавем. Ҳамзамон, устодам Шамсулло Қодиров бисёр шахси пуртаҷриба, сахтгир ва ботаҳаммул аст. Ҳатто барои омӯзиши як ҳаракат ва ё усул то ҳафтаю моҳҳо заҳмат мекашад, ки ман аз уҳдаи он ба хубӣ баромада тавонам. Бешак, гуфта метавонам, ки ҳама муваффақиятҳоямро аз заҳматҳои беохири устодам мебинам.

Дар зиндагӣ ҳар қадар ки аз волидони бузургворам шукргузорӣ ва миннатдорӣ намоям, кам аст. Зеро сарчашмаи ҳама хушбахтиҳоям падару модарамро медонам. Махсусан, падарам дар рушду инкишоф ва дастовардҳоям саҳми беназир дорад.

Қиёмиддин МАҲМАДҶОНОВ, "ҶТ"