Бо ташаббуси Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва раиси шаҳри Душанбе муҳтарам Рустами Эмомалӣ 21 июли соли 2020 Қасри теннис ва маҷмааи варзиши обии шаҳри Душанбе мавриди истифодабарӣ қарор дода шуд. Қасри намудҳои варзиши обӣ дар масоҳати 20 ҳазор метри муррабаъ бунёд гардида, аз 3 ошёна иборат аст. Дар ошёнаи якум 4 ҳавзи шиноварӣ мавҷуд аст, ки барои тамоми хоҳишмандон, ки мехоҳанд ба варзиши шиноварӣ, аз ҷумла аквааэробика машғул бошанд, пешбинӣ шудааст. Вобаста ба навъи варзиши аквааэробика бо директори Муассисаи давлатии “Мактаби махсуси варзишии захираҳои олимпии №4 оид ба шиноварӣ ва ҷаҳиш ба об”-и шаҳри Душанбе Муҳамаддилкушод Таваров суҳбат намудем, ки фишурдаи пешакӣ мегардад.

- Луфтан мегуфтед, ки аквааэробика чӣ гуна навъи варзиш аст?

- Аквааэробика яке аз воситаи мустаҳкам кардани саломатӣ, кам намудани вазни зиёдатии бадан ва ба ин восита то андозае дур кардани бадан аз ташвишҳои зиндагӣ мебошад.

Аквааэробика ин навъи махсуси фитнес буда, ба он ҳама нафароне, ки аз вазни зиёдатӣ азият мекашанд, ҳомиладорон ва инчунин, нафароне, ки ба онҳо кори зиёд иҷозат нест, машғул мешаванд. Тамринҳое, ки дар об мегузаранд, аз машқҳое, ки дар фитнес мегузаранд (толорҳои варзишӣ), фарқ дорад. Дар об баданамонро сабуктар эҳсос мекунем, бинобар ин баъди тамрин низ шахс дарди бадан ва мондагиро эҳсос намекунад.

Аквааэробика варзишест, ки ба он аслан занону духтарон машғул мешаванд. Чунки ин намуди варзиш дар ҳавзҳои пӯшидаи на он қадар чуқур, аз 1 метр то 1,30 см гузаронида мешаванд. Аквааэробика ин варзиши рақобатӣ нест, ғолиб надорад. Мақсади асосии ин варзиш ҷалби занону духтароне, ки дар коргоҳи худ бисёр менишинанд ва ҳаракати ҷисмонӣ надоранд, мебошад. Занони хонашин ҳам, ки онҳоро фарбеҳӣ таҳдид мекунад, метавонанд дар як ҳафта 3 маротиба ба аквааэробика машғул шаванд. Ин навъи варзиш имунитетро мустаҳкам намуда, ба саломатӣ манфиати зиёд меорад. Инчунин, бо машғул шудан ба аквааэробика имкон дорад, ки вазни зиёдатиро нест кунед. Ин намуди варзиш ҳатто ба занони ҳомиладор тавсия дода мешавад, зеро дар вақти таваллуд ҳамаи мушакҳои онҳо бояд боқувват бошанд. Бинобар ин ҳангоми машғул шудан ба аквааеэробика ва ё худ шиноварӣ ҳамаи мушакҳои бадан кор мекунанд ва боқувват мешаванд.

- Барои нафароне, ки ба аквааэробика машғул мешаванд, ҳунари оббозӣ доштан шарти асосӣ аст?

- Агар мо ба дигар намудҳои варзиши обӣ машғул шавем, аз ҷумла шиноварӣ, туббозӣ дар об, ҷаҳидан ба об, шиноварии бадеӣ ва қаиқронӣ ҳунари оббозӣ дар мадди аввал меистад. Ҳатто кайҳоннавардон агар аз ҳунари шиноварӣ маҳрум бошанд, ба онҳо иҷозати парвоз ба кайҳон дода намешавад.

Вале дар намуди аквааеробика агар шахс оббозиро натавонад ҳам, ашёҳои махсус бо номи аквапояс ҳаст, ки дар бадани шахс насб мешавад ва шахс ба осонӣ ба ин намуди варзиши обӣ машғул мешавад. Машғулиятҳои аквааэробикавӣ ин ба муқобили об ҳаракат кардан аст.

Қайд кардан ба маврид аст, ки агар шахс аз ҳунари шиноварӣ маҳрум бошад, метавонад ба мураббии аквааэробика муроҷиат намояд ва дар муддати кӯтоҳ аз ин ҳунар бархӯрдор шавад ва дар оянда ба аквааэробика машғул шавад.

- Дар боло қайд намудед, ки яке аз манфиатҳои аквааэробика ин кам намудани вазни зиёдатӣ аст. Ин то куҷо дуруст аст?

- Агар мо ба ин намуди варзиш 2 - 3 моҳ пайваста машғул шавем, ҳадиақал дар фасли тобистон ва ҳамаи супоришҳои мураббиро ба пуррагӣ иҷро намоем, беҳтарин воситаи харобшавӣ аст. Таҷрибаҳо нишон додаанд, ки ҳамаи намудҳои варзиши обӣ инсонро хароб мекунанд. Дар сурате, ки шахс хароб аст, имунинтеташ баланд мешавад, шушҳояш васеъ мегардад, кори дилаш нағз шуда, рагҳои хунгард васеъ ва системаи асаб ором мешавад. Инчунин, нафари харобро, ки машғули аквааэробика ҳаст, фарбеҳшавӣ таҳдид намекунад.

- Дар кадом ҳолат ба аквааэробака ва шиноварӣ машғул шудан мумкин нест?

- Пеш аз ба ҳавзи шиноварӣ рафтан инсон бояд худашро нағз ҳис кунад. Баъдан ба инсонҳое, ки бемории “припатка” доранд, иҷозат нест, ки ба ҳавзи шиноварӣ ё лаби дарё равад. Инчунин, машғул шудан ба варзиши обӣ ба шахсоне, ки ҷароҳатҳои кушода доранд, мумкин нест. Баъдан нафароне, ки ягон навъи касалиҳои пуст доранд, қатъиян ба шиноварӣ машғул шудан иҷозат нест.

Дар охир, илова кардан мехоҳам, ки аҳолӣ шиновариро ба кӯдаконашон омӯзонанд, чунки тани солим аз дуруст риоя кардани тарзи ҳаёти солим сарчашма мегирад.

Мусоҳиб Садбарг СУЯРОВА,
“ҶТ”