20-уми ноябр дар кишвари арабии Қатар Чемпионати ҷаҳон оид ба футбол оғоз ёфт. Мусобиқа то 18-уми декабр идома карда, қаҳрамони нави ҷаҳон муайян хоҳад шуд. Имрӯзҳо дар ҳар як гӯшаву канори олам аз пирӯзии футболбозони ин ё он дастаи кишварҳо сухан мегӯянду комёбиҳои нотакрори онҳо руҳияи ҳаводорони футболро басо болида месозад. Ҳар яке дастаи дӯстдоштаи худро мухлисӣ намуда, хоҳони пирӯзии дастаи хеш дар ин мусобиқоти ҷаҳонист.

Имомбек Шодибекзод, шореҳи телевизиони “Варзиш ” бар он назар аст, ки бо такя ба андешаи маъруфтарин коршиносони футболи ҷаҳонӣ ва ситораҳои саршиноси варзиши рақами аввал метавон гуфт, ки мунтахабҳои Бразилия, Аргентина, Фаронса ва ҳатто Англияро низ ба радифи аввалинҳо баҳри ғолибият дар мусобиқоти имсолаи Қатар-2022 шомил намудан дуруст аст.

- Ҳарчанд ки баъди мушоҳида аз аввалин бозиҳои гурӯҳӣ шубҳаҳо нисбати қаҳрамонии Аргентина пайдо шуданд, вале дастаи Месси бо ишғоли зинаи аввал дар гурӯҳ аз зумраи муддаиёни асосӣ барои пирӯзӣ дар Қатар дониста мешавад. Бар замми ин Бразилия ҳам бо иқтидори бузурги ҳамешагии хеш метавонад баъди бист сол ҷомро ахиран ба хона барад, аммо ба андешаи ман он сатҳи сифати намоиши майдоние, ки фаронсавиҳо дар замини Қатар нишон дода истодаанд, дар роҳи дифои қаҳрамонӣ барои яккачини Дидйе Дешам басандагӣ хоҳад кард,- иброз дошт И. Шодибекзода.

Воқеан ҳам дастаи мунтахаби Фаронса хуб бозӣ карда ба даври ¼-ниҳоии мусобиқот роҳ ёфт. Дар доираи бозиҳои даври ҳаштякниҳоӣ тимҳои Фаронса ва Лаҳистон бо ҳам омаданд. Вохӯрии дастаҳо дар варзишгоҳи “Ал-Тумама” доир шуда, бо ҳисоби 3 бар 1 ба суди фаронсавиҳо хотима ёфт, ки ин фоли нек аст, то дастаи мунтахаби Фаронса муваффақ шавад.

Бояд гуфт, ки фоизи идоракунии тӯб дар испаниҳо 81,7% буд. Ин беҳтарин натиҷа дар таърихи чемпионатҳои ҷаҳон аст. Қабл аз ин рекорд ба тими миллии Аргентина тааллуқ дошт. Дар бозӣ бо Юнон дар мусобиқаи соли 2010 аргентиниҳо 80,3% вақти бозӣ ба тӯб соҳибӣ кардаанд.

Коршиносони соҳаи футбол якчанд дастаҳоро ба қатори ҷӯяндагони унвони қаҳрамонӣ ном мебаранд. Аз ҷумла Фаронса, Испания ва Бразилия. Онҳо бар он андешаанд, ки бо такя ба натиҷагирӣ аз кори пурсамари технологияҳои навине, ки дар 22-юмин мусобиқаи ҷаҳонӣ мавриди корбарӣ қарор гирифтааст, бе шубҳа кадом дастае, ки хуб бозӣ кард, метавонад соҳиби ҷоми ҷаҳон шавад.

Тибқи мушоҳидаҳо то ҳол вобаста ба қарори доварон бо такя ба фанновариҳои навин норозигиҳои бузург ба миён наомадааст. Ҳарчанд ки системаи ВАР (Video Assistant Referee) бори аввал чор сол пеш дар ҷоми ҷаҳонӣ Русия-2018 роҳандозӣ шуда бошад ҳам (манзур танҳо бозиҳои ҷоми ҷаҳонӣ), бо воридкунии фановариҳои муосиртарин ва бартараф кардани нуқсонҳои техникии кори тасвирии доварон таъмини адолат вақти рақобатҳои майдонӣ боз ҳам равшантар мушоҳида мешавад, мегӯянд мутахассисон.

ТОҶИКИСТОН ВА ҶОМИ ҶАҲОН

Аз мушоҳидаҳо бармеояд, ки тӯли чанд соли охир футболбозони тоҷик низ дар майдонҳо хуб ҳунарнамоӣ намуда истодаанд. Муваффақиятҳои футболбозони навраси тоҷик давоми даҳ соли охир дар таърихи футболи тоҷик беназир аст. Давоми ин солҳо метавон аз муваффақияти тими мутахаби ҷавонони то19- солаи кишвар, ки солҳои 2016 ва 2018 то марҳилаи 1\4 ниҳоӣ баромада буданд, гуфт. Дастоварди дастаи мунтахаби наврасони то 17- сола, ки дар Чемпионати Осиё дар соли 2018 ба бозии ниҳоӣ роҳ ёфта, соҳиби медалҳои нуқра, мақоми дуюм ва роҳхат ба Ҷоми ҷаҳон-2019 ба Бразилия шуданд, аз далелҳои дигари рушд ёфтани футбол дар кишвар аст.

Бар асоси натоиҷи марҳилаи интихобии мусобиқоти Ҷоми Осиё-2023, мунтахаби Тоҷикистон бори аввал ба даври ниҳоии мусобиқот роҳ ёфт, ки бешак муваффақияти бузурги футболи ватанист.

Бо ин муваффақиятҳо, агарчи кӯчак ҳам бошанд, оё бо гузашти 1 ё 2 чорсолаи дигар мо метавонем умед бандем, ки футболбозонамон дар майдонҳои Чемпионати ҷаҳон ҳунарнамоӣ мекунанд. Вобаста ба ин назарҳо гуногунанд. Ҳамсуҳбати мо Имомбек Шодибекзод назарашро чунин баён намуд:

“Дар мавриди эҳтимолияти иштироки мунтахаби миллии кишвар агар ҳарф занем, метавон гуфт, ки бо зиёд гардидани шумораи дастаҳои иштирокчӣ дар ҷоми ҷаҳон то ба 48 даста, ки аз соли 2026 дар кишварҳои Мексика, Амрико ва Канада гузаронида мешавад, имконияти роҳхатгирии мунтахаби миллии Тоҷикистон низ дар ин росто боло меравад. Зеро дар сурати иштироки 48 даста шумораи роҳхатҳои осиёӣ низ бештар гардида, чунин рафти кор дар бозиҳои ояндаи марҳилаи интихобии ҷоми ҷаҳон ба мунтахаби мо кумакрасон хоҳад буд. Аз ҷониби дигар баромади муваффақи намояндагони КФО (Конфедератсияи футболи Осиё) дар ин мусобиқоти қатарӣ, албатта ба тақдими роҳхатҳо ба ҷоми ҷаҳон барои футболи Осиё таъсири мусбӣ мерасонад. Аммо дар умум ин ҳолат пеш аз ҳама ба баромади муваффақи мунтахаби Тоҷикистон дар сабқатҳои дарпешистода, бахусус Ҷоми Осиё-2023 вобастагӣ дорад. Маҳз баъди баромад дар чунин сабқатҳои қоравӣ метавон гуфт, ки то куҷо мунтахаби миллии кишвар баҳри роҳхатгирӣ ба ҷоми ҷаҳонӣ омода буда метавонад”.