Ҳамасола дар арафаи ҷашни Наврӯзи бостонӣ дар ҷумҳурӣ бозиҳои варзишӣ гузаронида мешавад, ки аз ҳама намуди маъмулии он гуштини миллист. Беҳрӯз Хоҷазода, донишҷӯи Донишкадаи Тарбияи Ҷисмонии Тоҷикистон ба номи С. Раҳимов дар ин навъи варзиш имсол маҳорати баланди варзишӣ нишон дода, ғолиби Ҷоми пойтахт- 2017 оид ба гуштини миллӣ гардид. Ӯ инчунин чор маротиба ғолиби спартакиадаи донишҷуён, соҳиби ҷои сеюм дар Чемпионати Осиё ва дорандаи унвони устоди варзиш мебошад. Бо Беҳрӯз Хоҷазода суҳбат намудем, ки фишурдааш пешкаш мегардад.

- Нахуст дар бораи оғози фаъолияти варзишиатон мегуфтед ва бо кадом мақсад по рӯи гилеми гуштин ниҳодед?

- Ҳар вақте ки дар ҷашнҳои наврӯзӣ мусобиқаҳои гуштингирӣ мешуд, мо аз аввал то охир дар он ҷо иштирок менамудем ва бо як шавқу ҳаваси кӯдакӣ рақобатҳоро тамошо менамудем. Оҳиста–оҳиста дар дили ман ин намуди варзиш ҷо шуд ва бори нахуст дар синни 10-солагиям роҳ ба сӯи тамрингоҳи Садриддин Обидов пеш гирифтам ва карераи варзишиамро аз намуди гуштини самбо оғоз намудам. Ҳар як шахс пеш аз коре, ки бояд оғоз намояд, дар пеши худ мақсад мемонад ва мақсади ягонаи ман ба мисли дигар варзишгарони тоҷик бардоштани Парчами Ватан дар арсаи ҷаҳонист.

- Сабаби гузаришатон аз гуштини самбо ба ҷудо чӣ буд?

- Ман дар гуштини тарзи самбо тӯли 8 сол тамрин намудам ва соли 2014 ҳуҷҷатҳоямро ба Донишкадаи тарбияи ҷисмонии Тоҷикистон ба номи С. Раҳимов супоридам. Дар он давра ман медонистам, ки гуштини ҷудо шомили Бозиҳои олимпӣ аст ва аз худи ҳамон сол зери роҳбарии Садриддин Обидов, ки устоди варзиши байналмилалӣ мебошад, ба хотири муаррифии миллату давлати хеш дар арсаи ҷаҳонӣ ба ин намуди варзиш зиёдтар машғул гардидам.

- Киро идеали худ медонед?

- Имрӯз дар намуди гуштини ҷудо идеали ман варзишгари Ҷопонӣ Сёхэй Оно аст, ки соли 2016 дар шаҳри Рио-де-Жанейрои давлати Бразилия, дар вазни 73 кг ҷоизадори медали тиллоӣ олимпӣ гардида буд. Дар рафти рақобатҳо ӯ усулҳои учи мата ва потхватро бо маҳорати баланд истифода мебарад ва ҳамеша аз ҳарифонаш фарқ менамояд. Ман дар рафти тамринҳо усулҳои ӯро кор мекунам ва ҳаракат менамоям, ки ҳама рақобатҳои ӯро тамошо намоям.

- Беҳтарин хотира дар карераи варзишиатон?

- Ҳар як варзишгаре, ки бори нахуст дар мусобиқаҳои ҷаҳонӣ рафта парчами кишвари худро баланд мебардорад, ин як хотираи фаромӯшнашаванда дар тӯли ҳаёташ мебошад. Соли 2014 дар давлати Ҷопон Чемпионати Осиё байни наврасон баргузор гардида буд. Ман дар ин гуна чорабинии байналмилалӣ бори аввал иштирок доштам ва тавонистам сазовори ҷои сеюм гардам, ки ин хотираи фаромӯшнашавандаи ман мебошад.

- Дар фаъолияти варзишиатон лаҳзаҳои мушкил буданд?

- Яке аз мушкилтарин лаҳза дар ҳаёти варзишиам соли 2016 ба вуқуъ омода буд. Пас аз роҳхат гирифтан ба Ҷоми Ҷаҳон-2016, ки дар шаҳри Алмаатои Қазоқистон баргузор мегардид, дар вақти тамрин пойям шикаст ва ман ҳуқуқи ширкат варзиданро аз даст додам, ки ин яке аз рӯзҳои вазнинтарини ман буд. Шаш моҳе, ки барои барқарор гардидани поям истироҳат намудам, як рӯзаш ба мисли сол мегузашт.

- Аз нигоҳи Шумо имрӯз варзишгарони тоҷик аз намуди гуштини ҷудо дар кадом сатҳ қарор доранд?

- Варзишгарони тоҷик имрӯз аз намуди гуштини ҷудо дар сатҳи хуб қарор доранд ва яке аз онҳо Комроншоҳи Устопириён мебошад, ки дар Чемпионати Осиё-2017 дар шаҳри Ҳонконги Чин мақоми аввалро соҳиб шуд. Дар мусобиқаи мазкур аз Тоҷикистон ҳафт паҳлавон – Сӯҳроб Боқиев (-60 кг), Хушқадам Хусравов (-66 кг), Саидмухтор Расулов (-73 кг), Садр Боев (-81 кг), Комроншоҳи Устопириён (-90 кг) Саидҷалол Саидов (-100 кг) ва худи ман дар вазни (-73 кг), бо роҳбарии сармураббӣ Фахриддин Раҳимов ширкат варзидем ва аз миёни 28 давлат бо гирифтани як медали тилло, ду ҷои панҷум ва як ҷои ҳафтум дар зинаи панҷум қарор гирифтем, ки ин як нишондоди хуб мебошад.

- Барои роҳхат гирифтан ба олимпиадаи Токио-2020 чӣ нақшаҳо доред?

- Аввалин нақшаам дар чемпионати ҷаҳон, ки 28 август то 3 сентябр дар Маҷористон баргузор мегардад, ширкат варзидан аст. Баъдан дар мусобиқаҳои Гранпри, Гранслам оид ба ҷудо, ки мусобиқаҳои сатҳашон байналмилалӣ мебошанд, иштирок намуда имтиёзҳои даркориро барои роҳхат гирифтан ба олимпиадаи Токио-2020 ба даст овардан аст. Айни ҳол ман дар рейтинги ҷаҳонӣ мақоми 92-ро касб намудаам ва барои роҳхат гирифтан имкониятҳо зиёд аст. Кӯшиш менамоям, тамоми имкониятҳоямо истифода бурда, мавқеамро дар рейтинги ҷаҳонӣ боло бардошта, роҳхат ба бозиҳои олимпии Токио-2020-ро ба даст орам. Дар охир аз роҳбарияти Донишкадаи тарбияи ҷисмонии Тоҷикистон ба номи С. Раҳимов изҳори сипос менамоям, ки имрӯз донишҷӯёнро хуб дастгирӣ менамоянд.

- Ташаккур барои суҳбат! Ба Шумо барору комёбӣ хоҳонем.

Шаҳбози АСОМИДДИН, “ҶТ”