Дар майдони варзишии мактаби таҳсилоти миёнаи умумии №3-и шаҳри Бохтар, бахшида ба ҷашни 30-солагии Истиқлолияти давлатии Ҷумҳурии Тоҷикистон ва Рӯзи конститутсия мусобиқаи футбол байни хонандагони синфҳои 8, 9, 10 ва 11 баргузор гардид.

Ба таъкиди Саймурод Қаҳҳоров, муовини директори мактаби мазкур мақсад аз баргузории мусобиқа ин баланд бардоштани завқи варзишдӯстии ҷавонон, рушд ёфтани тарбияи ҷисмонӣ ва варзиш, ташвиқу тарғиби тарзи ҳаёти солим ва дар амал татбиқ намудани “Барномаи рушди футбол дар шаҳри Бохтар барои солҳои 2017-2021” мебошад.

Дар мусобиқа 12 даста иштироку миёни ҳам қувваозмоӣ намуда, ду дастаи беҳтарин – дастаи “Синфи 11 (А)” ва “11 (Б)” ба даври ниҳоӣ роҳхат гирифтанд.
Дар натиҷа дастаи “Синфи 11 (Б)” ба дастаи “Синфи 11(А)” бо ҳисоби 2:1 ғолибият ба даст овард.

Дар охир ғолиби мусобиқа бо Ҷом, медал, ифтихорнома ва туҳфаҳои хотиравӣ сарфароз гардонида шуд.