Шодӣ Сафаров, ректори Донишкадаи тарбияи ҷисмонии Тоҷикистон ба номи С. Раҳимов 9 феврал зимни нишасти хабарии донишкада иброз дошт, “Мо нақша дорем, факултети "Гӯштини миллӣ"-ро таъсис диҳем.

Номбурда дар шарҳи ин гуфтаи хеш илова кард, ки ин тасмим дар радифи мақоми байналмилалӣ гирифтани гӯштини миллӣ ба нақша гирифта шудааст.

Ӯ гуфт: “Боиси хушҳолист, ки бо ташаббуси Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва раиси шаҳри Душанбе муҳтарам Рустами Эмомалӣ гӯштини миллии мо мақоми байналмилалӣ гирифт. Мо дар робита ба ин тасмим гирифтем, ки барои рушди беш аз пеши ин соҳа факултетеро бо номи “Гӯштини миллӣ” таъсис диҳем. Ман боварӣ дорам, ки ин факултет барои боз ҳам рушд кардани гӯштини миллиамон нақши калон хоҳад гузошт”.

Ҳ. РАҲМАТУЛЛОЕВ, “ҶТ”