Ба ифтихори 30 – солагии Истиқлоли Ҷумҳурии Тоҷикистону Ваҳдати миллӣ дар ноҳияи Ишкошим иншооти варзишӣ мавриди истифода қарор гирифта, бунёди як қатор сохтмонҳои дигар бомаром идома доранд.

Тавре аз мақомоти иҷроияи ҳокимияти давлатии ноҳия иттилоъ доданд, ҳоло дар деҳаи Зонги Ҷамоати деҳоти Зонги ноҳия бо иқдоми ҷавонони деҳа майдончаи варзишӣ бо арзиши зиёда аз 24 ҳазор сомонӣ сохта шуда, мавриди баҳрабардорӣ қарор гирифт.

Дар ифтитоҳи майдонча муовини раиси ноҳия Холдорзода Ашам ва мудири бахши кор бо ҷавонон ва варзиши ноҳия Раҳмиддин Давлатқадамов ширкат намуда, ҷавонони бунёдкору варзишгаронро бо сипосномаҳои раиси ноҳияи Ишкошим Мирзозода Мусо Одинамуҳаммад қадрдонӣ намуданд. Инчунин аз тарафи бахш ба ҷавонон ифтихорномаю мукофоти хотиравӣ тақдим гашт.