Эмомалии Нуралӣ. Варзишгари ҷавон, вале номошнои меҳан, ки бо ҳунару маҳорати воло ва чусту чолокии худ ба дили ҳаводоронаш роҳ пайдо намудааст. Ин варзишгари муваффақи кишвар тавонист, дар рӯзи аввали мусобиқаи “Tashkent Grand Slam 2024”, ки аз 1-ум то 3-юми марти соли равон баргузор гардид, ба хазинаи варзишии кишвар нишони заррин ворид намояд. Ин дуюмин медали гӯштингири мо аз мусобиқаи Гранд Слами Тошканд ба ҳисоб меравад. Бахшида ба ин ғалаба ва роҳи тайкардаи Эмомалӣ дар ҷодаи варзиш бо ӯ суҳбат намудем.

- Ду соли пайиҳам ғалаба дар Гранд Слами Тошканд. Чӣ эҳсосоте доштед ҳангоми бори дуюм ба даст овардани нишони мазкур?

- Эҳсосоте, ки ҳангоми ба гардан овехтани медал ба як варзишгар даст медиҳад, ногуфтанист. Ин эҳсосро наметавон ба забон овард. Ин бори дуюм аст, ки аз Гранд Слами Тошканд барандаи нишони арзишнок мегардам. Бори дуюм ба даст овардани медал ифтихори дигарборае буд, то шаҳди пирӯзӣ ва ин эҳсоси гувороро бори дигар таҷриба намоям.

- Вақте медали тиллоро ба даст овардед, яке аз блогерони шинохтаи узбек шуморо табрик кард. Ба як варзишгар чӣ ҳиссиёте даст медиҳад, вақте ҳунари ӯро берун аз кишвар низ таҳсин мехонанд?

- Ростӣ, гарчанде фаҳмидам, ки он нафар аз ҳамсоякишвари мо - Узбекистон аст, аммо дар мавриди блогер будани ӯ иттилоъ надоштам. Ба ҳар сурат, вақте ҳунари варзишгарро дар мамлакати дигар таҳсин мехонанд, барои варзишгар ҳисси ифтихор ба амал меояд. Ман низ ба монанди дигар варзишгарон ба ин ҳолат мувоҷеҳ шудам. Ҳисси ифтихори ман аз он буд, ки пирӯзиам сабаб шуд, то Суруди миллии мо садо дода, парчами кишварамон парафшон гардад ва намояндагони дигар миллатҳо бароям кафкӯбӣ кунанд. На танҳо аз табрикоти ӯ, балки аз таб-рикоти ҳамаи мухлисон, ҳаводорон ва ҳамватаноне, ки маро дастгирӣ карданд, шод шудам ва аз якоякашон баҳри таманниёти нек миннатдорам.

- Чӣ сир ё сабаби асосие аст, ки шуморо ду сол паёпай дар Гранд Слами Тошканд ғолиб мегардонад?

- Дар ин ғалабаҳо ҷустуҷӯи сир ё сабаб лозим нест. Зеро чунин чиз ҳам вуҷуд надорад. Ягона роҳи муваффақият, ба фикри ман, ин талоши бештар ва ҳадафи муайян аст. Агар дилхоҳ варзишгар ҳадафи худро муайян кунад ва барои расидан ба он талош намояд, ҳатман муваффақ хоҳад шуд. Ҳамааш аз саъю талош вобаста аст. Мо низ меҳнат кардем ва подошашро низ гирифтем. Дар дигар мусобиқот низ кӯшиш ба харҷ медиҳем, то ҳамин гуна саъю талош намуда, муваффақ гардем.

- Баъд аз ин ғалабаи бузург шумо соҳиби 1000 хол дар радабандии ҷудои ҷаҳон гардида, дар ин рӯйхат ба таври назаррас боло рафтед. Барои аз даст надодани мавқеъ ва гирифтани роҳхат ба Бозиҳои олимпӣ боз дар кадом сабқатҳо иштирок хоҳед кард?

- Айни замон мо омодагиҳоро баҳри иштирок дар мусобиқаҳои оянда дида истодаем. Пеш аз Бозиҳои олимпӣ моро чанд мусобиқаи байналмилалии дигар дар пеш аст, ки дар онҳо ҳунарнамоӣ хоҳем кард. Дар ҳоли ҳозир барои иштирок дар Гранд Слами Анталия ва баъдан Чемпионати ҷаҳон тамрин карда истодаем. Мақсади мо нишон додани натиҷаҳои назаррас аз ин рақобатҳо аст. Боварӣ дорем, ки ба ин мақсад хоҳем расид.

- Шумо ҳамчунин соли 2022 ба гирифтани унвони қаҳрамони ҷаҳон миёни ҷавонон даст ёфта будед. Аз ин қаҳрамонӣ чӣ хотироте дар ёд доред?

- Чемпионати ҷаҳоне, ки байни ҷавонон дар кишвари Эквадор баргузор гашт, хотирмонтарин мусобиқа дар корномаи варзишиам ба ҳисоб меравад. Зеро ин аввалин мусобиқаи байналмилалие буд, ки ман медал ба даст овардам. То ҳоло ин мусобиқа ва медали аз он бадастоварда илҳомбахш ва нерудиҳандаи ман дар сабқатҳои дигар мебошад.

- Наврӯз яке аз ҷашнҳоест, ки бисёре аз гӯштингирони шинохтаи мо дар рафти ин иди миллӣ ҳунарнамоӣ кардаанд. Оё шумо ҳам аз овони хурдсолӣ дар мусобиқоти наврӯзӣ ширкат мекардед?

- Бале. Наврӯз албатта иди миллии тоҷикон аст, ки дар кишварамон бо шукӯҳу шаҳомати хоса таҷлил мегардад. Ба ман низ ин иди бостонӣ хеле писанд аст. Дар хурдсолӣ дар наврӯзиҳои деҳа иштирок карда, гӯштин мегирифтам. Ҳудуди чор ё панҷ сол ба ҳайси гӯштингир дар чорабиниҳои наврӯзӣ ширкат кардаам.

- Сабаби майл ба варзиш намудани шумо кӣ ё ва чӣ буд?

- Аслан, ман ба дунёи варзиш бо хости падар ворид шудам. Падари ман – Нуралӣ Бобокалонов худ гӯштингир буд ва ӯ низ дар наврӯзиҳо баромад мекард. Ман ҳам бо хости падар рӯ овардам ба гӯштин. Ӯ ҳамеша ба ман мегӯяд, ки писарам, ту ҳатман қаҳрамон хоҳӣ шуд. Ва ин суханони падар дар вуҷуди ман бовариро нисбат ба хеш бештар мегардонад.

- Берун аз варзиш ҳоло дар кадом ришта таҳсил карда истодаед?

- Айни замон донишҷӯи курси 4-уми Донишгоҳи давлатии тиҷорати Тоҷикистон мебошам.

- Дар оила ба ғайр аз шумо боз киҳо ба варзиш машғуланд?

- Дар оила мо се писар ҳастем. Ҳарсе бародарон ба варзиш машғулем. Ман ва додарам Ёсин гӯштингири сатҳи байналмилалӣ шудем, аммо Шодмон танҳо дар мусобиқоти дохилӣ баромад мекард.

- Мақсади шумо аз интихоби варзиш чист? Ба даст овардани маблағи бештар, гирифтани медалу машҳур шудан, ё парафшонии парчам дар сабқатҳои байналмилалӣ?


- Албатта, ҳар як инсон бо як ҳадафи мушаххас ба ҷодае, хоҳ тиҷорат бошад, хоҳ варзиш ё чизи дигар ворид мешавад. Ман низ ҳадафҳои худро дар ин ҷода дорам. Ҳадафи ман аз варзишгар шудан, ин дар мадди аввал баланд бардоштани парчами кишвар бо ғолибият дар сабқатҳои байналмилалӣ аст. То ҳама мардуми ҷаҳон бидонанд, ки мо - тоҷикон низ метавонем дар дилхоҳ сабқатҳои байналмилалӣ маҳорати баланд нишон диҳем. Сабаби дигар ин ба даст овардани обрӯ миёни мардум ва лоиқи таҳсини онҳо гардидан аст. Аммо барои маблағ ин роҳро интихоб накардаам. Зеро бароям дар ин роҳ ба даст овардани маблағ чандон муҳим нест.

Ҳошим РАҲМАТУЛЛОЕВ, “ҶТ”