Бо мақсади эҳё, рушд ва амалии бозиҳои миллии варзишӣ ва тарбияи насли наврас дар рӯҳияи эҳтиром ва арҷгузорӣ ба таъриху анъанаҳои миллии аҷдодон, ҳамзамон таҳкими тарзи ҳаёти солим, ҳисси худшиносиву худогоҳӣ, зиракии сиёсӣ ва пешгирии омилҳои номатлуб дар байни насли наврас, баргузории ҳамасолаи Фестивали бозиҳои миллии варзишӣ дар се марҳила (маҳаллӣ, минтақавӣ ва миллӣ) дар остонаи таҷлили иди байналмилалии Наврӯз (марҳилаи якум), Ваҳдати миллӣ (марҳилаи дуюм) ва ҷашни Истиқлолияти давлатӣ (марҳилаи сеюм) тасдиқ гардид.

Дар ин замина, бо мақсади дар сатҳи баланди касбию ташкилӣ баргузор шудани чорабинии мазкур зери роҳбарии президенти Федератсияи футболи Тоҷикистон Рустами Эмомалӣ Кумитаи тадорукот ташкил карда шуда, консепсия, нақшаи омодагӣ, тартиби баргузории мусобиқаҳо тасдиқ гардид.

Қобили қайд аст, ки маҳз бо мусоидати бевоситаи Рустами Эмомалӣ 17 сентябри соли 2016, дар заминаи баргузории мусобиқаи ҷумҳуриявии гӯштини миллӣ бахшида ба 25-солагии Истиқлолияти давлатии Ҷумҳурии Тоҷикистон, нахустин Фестивали бозиҳои миллии варзишӣ (намоишӣ) дар шаҳри Душанбе доир гардида буд.

Марҳилаи аввали Фестивали бозиҳои миллии варзиш аз 21 то 25 марти соли 2017 дар заминаи таҷлили ҷашни Наврӯзи байналмилалӣ аз рӯи 8 намуди варзиш (мусобиқа) ва аз рӯи 10 намуд (бозиҳои намоишӣ) дар сатҳи шаҳру ноҳияҳои ҷумҳурӣ баргузор карда мешавад.

Намудҳои миллии варзишие, ки аз рӯи онҳо мусобиқаҳои даставӣ баргузор карда мешаванд:
- Гӯштини миллии суннатӣ;
- Чавгонбозӣ;
- Шиноварӣ;
- Вазнабардорӣ (сангбардорӣ);
- Дастхобонӣ;
- Пойга (варзиши сабук, давидан ба масофаҳои 200,400,800 метр)
- Шоҳмот;
- Бандкашӣ.

Намудҳои миллии варзишие, ки ҳамчун намудҳои намоишӣ дар ҷараёни оғози Фестивали бозиҳои миллии варзишӣ ба маъраз гузошта мешаванд:
- Хурусҷанг;
- Чиликдангал;
- Ланкабозӣ;
- Биҷилбозӣ;
- Камонварӣ;
- Шамшерзанӣ;
- Камолғулак;
- Фалағмолпартоӣ;
- Ҳойталак;
- Бандпарак.