Бо ташаббуси Президенти Федератсияи футболи Тоҷикистон Рустами Эмомалӣ бахшида ба 27 - умин солгарди Истиқлолияти давлатии Ҷумҳурии Тоҷикистон дар шаҳри Хоруғи ВМКБ майдони нави футболбозӣ мавриди баҳрабардорӣ қарор гирифт.

Дар маросими ифтитоҳи он раиси вилоят Шодихон Ҷамшед, ноиби президенти Федератсияи футбол Хуршед Мирзо, сардори Раёсати кор бо ҷавонон ва варзиши вилоят Сураҷ Чоршанбиев ва варзишгарону сокинони шаҳр ширкат намуданд.

Зимни ифтитоҳи майдон қайд гардид, ки то ин муддат ба чунин тарҳи нав дар шаҳри Хоруғ майдони футболбозӣ мавҷуд набуда, он дар доираи сиёсати бунёдкоронаи Роҳбарияти олии мамлакат ҳамчун маркази замонавии тарғиби тарзи ҳаёти солим ба истифода дода шуд.
Дар ҷавоб ба ин ғамхориҳо варзишгарону ҷавонон, наврасон ва сокинони шаҳр миннатдории самимии хешро ба Ҳукумати кишвар, шахсан ба Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон ва президенти Федератсияи Футболи Тоҷикистон баён намуданд.

Гуфта шуд, ки майдони мазкур бо маблағи 64 000 доллари америкоӣ аз тарафи Федератсияи футболи Тоҷикистон сохта ба истифода дода шуд ва бунёди чунин иншоот минбаъд низ дар вилоят идома хоҳад кард.

Баъди маросими ифтитоҳ бо иштироки кудакону варзишгарон дар майдони нав фестивали бачагона гузаронида шуда, ба онҳо либосу лавозимоти варзишӣ тақдим гардид.