Исматулло Умаров, варзишгари 19-солаи тоҷик аз риштаи дастхобонӣ, дар мусобиқаҳои ҷумҳуриявию байналмилалӣ ширкат намуда, ду маротиба ҷоизадори чемпионати Осиё, чор маротиба қаҳрамони Тоҷикистон аст. Номбурда дорандаи 15 медали мусобиқоти ҷумҳуриявӣ ва 7 медали мусобиқоти байналмилалӣ мебошад. Ҳамчунин, ҷоизадори фестивали байналмилалии “Шери тиллоӣ”-и шаҳри Екатеринбург аст.

1 майи соли равон Исматулло Умаров дар мусобиқаи умумирусиягӣ барои гирифтани “Ҷоми Танкоград” дар шаҳри Челябински Русия иштирок намуда, мақоми сеюмро касб намуд. Марат Идрисов, устоди ин варзишгар, дар суҳбат гуфт, ки “Ӯ аз хурдӣ ба намуди варзиши дастхобонӣ меҳру рағбати беандоза дошт. Дар мусобиқаҳо ҳамеша дастболо мешуд”.

- Аввалин мусобиқаи байналмилалие, ки ман дар он ширкат варзидам, чемпионати Осиё дар шаҳри Тошканти Ҷумҳурии Ӯзбекистон буд. Ман дар миёни варзишгарони 20 давлат мақоми сеюмро ишғол намудам, ки бароям фаромӯшнашаванда аст.  Ҳангоме ки дар дигар давлатҳо қувваозмоӣ намуда,  пирӯз мегардам ва Парчами кишварамон боло меравад, фахр мекунам, ки қарзи фарзандии худро адо кардаам”,-мегӯяд Исматулло.

Соли 2016 дар шаҳри Екатеринбурги Русия дар мусобиқаи “Золотой Тигр”, ки дар он варзишгарон аз 21 давлат аз рӯи 45 намуди варзиш миёни ҳам рақобат намуданд, Исматулло Умаров мақоми дуюмро соҳиб шуд.

Дар мусобиқаи байналмилалие, ки 15-16 апрели соли 2017 дар шаҳри Омски Русия бо иштироки 5 давлат: Тоҷикистон, Русия, Қазоқистон, Озарбойҷон ва Гурҷистон барпо шуд, Исматулло Умаров байни 10 варзишгар сазовори 2 медали тилло ва 1 биринҷӣ гашт.

Баъди ин пирӯзӣ Исматулло роҳхат ба чемпионати ҷаҳонро ба даст овард.