Имрӯз дар варзишгоҳи “20-солагии Истиқлолияти Тоҷикистон”-и шаҳри Хуҷанд бозии ниҳоии Ҷоми Тоҷикистон-2021 оид ба футбол доир гардида, дар он чемпиони феълии кишвар дастаи “Истиқлол”-и Душанбе ва дастаи “Хуҷанд”-и Хуҷанд бо ҳам рақобат намуданд.

Бозӣ хеле пуршиддат ҷараён гирифта, қисми асосии бозӣ бо ҳисоби мусовӣ 0:0 ба поён расид. Барои муайян гардидани ғолиб дастаҳо дар ду қисми иловагӣ бо ҳам қуваозмоӣ намуданд. Ҳамин тавр дар дақиқаҳои 105 ва 117-и қисмати иловагии бозӣ футболбозони дастаи “Хуҷанд” ба дарвозаи дастаи “Истиқлол” ду голи беҷавоб зада, барандаи Ҷоми Тоҷикистон оид ба футбол дар соли 2021 гардиданд.

Дастаи “Хуҷанд” баъди ин пирӯзӣ маротибаи панҷум Ҷоми кишвар оид ба футболро ба даст овард.

Ёдовар мешавем, ки аз ин пеш дар даври ниҳоии Ҷоми Тоҷикистон “Истиқлол” ва “Хуҷанд” ду бор бо ҳам рӯ ба рӯ шуда буданд. Соли 2010 душанбегиҳо бо ҳисоби 5:0 ва соли 2017 хуҷандиҳо бо ҳисоби 2:0 пирӯз гардида буданд.

“ҶТ”