Дар варзишгоҳи “Спартак”-и шаҳри Хуҷанд мулоқоти дастаи мунтахаби футболи ҷавонони 17-солаи Тоҷикистон бо раиси шаҳри Хуҷанд Маъруф Муҳаммадзода ва 6000 ҷавонони вилояти Суғд баргузор гардид.

Таъкид шуд, ки Федератсияи футболи Тоҷикистон дар якҷоягӣ бо Барномаи рушди Созмони Милали Муттаҳид дар Тоҷикистон як қатор чорабиниҳоро гузарониданд, ки ба тими ҷавонони кишвар (U-17) барои Ҷоми ҷаҳонии 2019 дар Бразилия пешбинӣ шуда буданд.

Дар чорабинӣ бозингарони дастаи мунтахаби ҷавонони Тоҷикистон (U-17) барои кӯдакон дарсҳои мастер-класс баргузор карданд ва ба онҳо тӯбу пироҳанҳо тақдим карданд.

Маъруф Муҳаммадзода, раиси шаҳри Хуҷанд бозингарони дастаи мунтахаби ҷавонони Тоҷикистон (U-17)-ро зимни суханронӣ таъкид намуд, ки иштироки ягона тими футболи наврасони Тоҷикистон миёни кишварҳои собиқ Шӯравӣ, аз ҷумла 24 тими пурқуввати қораи Осиё ва 211 мунтахаби миллии ҷаҳонӣ кори саҳл нест ва ин бахти бузург асту ифтихори кулли тоҷикистониён.

Дар охир раиси шаҳри Хуҷанд Маъруф Муҳаммадзода ба бозингарон туҳфаҳои хотиравӣ тақдим намуд.

Ёдовар мешавем, ки дар Ҷоми Ҷаҳон-2019 (U-17), ки аз 26 октябр то 17 ноябр дар Бразилия баргузор мешавад, дастаи мунтахаби ҷавонони Тоҷикистон дар гурӯҳи “E” якҷоя бо дастаҳои Испания, Аргентина ва Камерун бозӣ хоҳад кард.