Аз 26 то 28-уми марти соли равон дар шаҳри Тбилисии Гурҷистон мусобиқаи байналмилалӣ аз намуди гӯштини ҷудо таҳти унвони “Tbilisi Grand Slam” ҷараён меёбад. Дар ин мусобиқаи бонуфузи ҷаҳонӣ Тоҷикистонро ду нафар аз паҳлавонони шинохтаи ҷумҳурӣ - Шаҳбоз Саидаброров дар вазни -60 кг ва Комроншоҳи Устопириён дар вазни -90кг муаррифӣ намуданд.

Дар рӯзи аввали мусобиқа, ки миёни вазнҳои -60 кг баргузор гардид, Шаҳбоз Саидаброров дар даври аввал озод буд. Ӯ рақобатро аз даври дуюм бо намояндаи Ӯзбекистон - Шарофиддин Лутфуллоев доир кард. Дар ин дидор Шаҳбоз рақибро бо усули “иппон” мағлуб намуда, ба даври навбатӣ роҳ ёфт. Дар даври сеюм Шаҳбоз ҳарифи 27-солаи хеш - ҷудочии кишвари Юнон – Каракизиди Савваро шикаст дод. Дар даври ¼ финал аз намояндаи дигари Ӯзбекистон Нураллиев Комрон ноком шуда, рақобатро дар даври тасаллибахш идома дод. Дар даври мазкур Шаҳбоз бар ҳарифонаш аз Украина Олен Вередеба ва Торнике Тсакадоеа аз Ҳолланд пирӯз шуда, сазовори нишони биринҷии мусобиқаи мазкур шуд.

Хотиррасон мекунем, ки дар таърихи ҷудои тоҷик ин сеюмин нишони биринҷии мусобиқаи Grand Slam мебошад. Қаблан соли 2019 Сомон Маҳмадбеков (Osaka Grand Slam 2019) ва Беҳрӯзи Хоҷазода (Ekaterinburg Grand Slam 2019) бар гирифтани медали биринҷӣ даст ёфта буданд.

Қиёмиддин МАҲМАДҶОНОВ
“ҶТ”