12 феврал дар Маркази такмили ихтисоси кормандони соҳаи тарбияи ҷисмонӣ ва варзиш дар шаҳри Душанбе курси кӯтоҳмуддати 12-рӯзаи такмили ихтисос барои мураббиёни муассисаҳои тайёрии варзишии шаҳри Душанбе ва навоҳии тобеи марказ аз рӯи барномаи таълимии 72-соата ба итмом расид.

Дар ин курси такмили ихтисос 16 нафар шунавандагон (мураббиёни муассисаҳои тайёрии варзишӣ) иштирок намуда, давоми 12 рӯз, яъне аз 1 то 12 феврал барномаи таълимии курси кӯтоҳмуддатро омӯхта, ба ин васила тахассуси касбӣ ва сатҳи донишҳои соҳавии худро боло бурданд.

Қобили қайд аст, ки дар ин бахши бозомӯзӣ устодони варзидаи соҳа, номзадҳои илм ва лекторони соҳибтаҷриба нозукиҳо ва навгониҳои соҳаро ба шунавандагон омӯзониданд.

Дар ҷамъбасти курси мазкур Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон иштирок ва суханронӣ намуда, ба шунавандагони курс шаҳодатномаҳои хатм (намунаи давлатӣ)-ро тақдим намуданд.

Раиси Кумита дар суханронии худ қайд намуданд, ки “баъди хатми бомуваффақонаи курси такмили ихтисос, ки шумо дар ҷараёни омӯзиш аз бисёр қоидаҳои ҷадиди намудҳои варзиши байналмилалӣ, санадҳои маъёрию ҳуқуқии нав тасдиқ гардида ва дигар донишҳои соҳавӣ ба таври возеҳ ошно гардидед, акнун масъулиятатон дучанд шуд. Бовар дорем, ки шумо бо донишҳои аз бар намудаи худ дар тарбия ва баланд бардоштани дараҷа ва унвонҳои варзишии насли нав хидмати арзанда хоҳед кард”.