Бо мақсади тарғибу ташвиқи гуштини юнону румӣ дар байни наврасону ҷавонон, мустаҳкам намудани дӯстиву ваҳдат дар байни варзишгарон ва барои баланд бардоштани маҳорати касбии онҳо рӯзҳои 17 ва 18 май дар доираи нақша-чорабиниҳои Кумитаи ҷавонон, варзиш ва сайёҳии назди Ҳукумати кишвар бахшида ба “Соли ҷавонон” дар шаҳри Кӯлоб мусобиқаи гуштини юнону румӣ бо иштироки наврасони солҳои 2000—2002 аз тамоми манотиқи ҷумҳурӣ баргузор гардид.

Ба иттилои Зайниддин Давлатов, мудири Бахши ҷавонон, варзиш ва сайёҳии минтақаи Кӯлоб дар мусобиқаи мазкур намояндагон аз дастаҳои вилояти Суғду Хатлон, Бадахшон, шаҳру ноҳияҳои тобеъи марказ ва шаҳри Душанбе иштирок намуда, аз рӯи 10 вазн бо ҳам қувваозмоӣ намуданд.

Дар мусобиқа варзишгарони дастаи Душанбе бо ба даст овардани 5- медали тилло сазовори ҷои аввал, намояндагони дастаи вилояти Суғд ҷои дуюм ва намояндагони шаҳри Кӯлоб дар ҳайати дастаии Хатлон —2 сазовори ҷои сеюм шуданд.

Дар интиҳои мусобиқа варзишгарону ғолибонро намояндагони Кумитаи ҷавонон, варзиш ва сайёҳӣ, собиқадорон ва дигар дастандаркорон барои ноил гардидан ба унвони Чемпиони Ҷумҳурии Тоҷикистон ва номзад ба Устоди варзиши Ҷумҳурии Тоҷикистон оид ба намуди гуштини юнону румӣ табрик намуданд.

Гуштини юнони румӣ ё “калассикӣ” аз намуди варзиши олимпӣ ба ҳисоб меравад.

Исломи Раҷабалӣ, рӯзноманигор