Дар варзишгоҳи “Спартак”-и шаҳри Хуҷанд мусобиқаи байналмилалӣ оид ба бокс бахшида ба гиромидошти хотири устоди варзиш Азимҷон Тошев оғоз гардид.

Дар маросими кушодашавии ин чорабинии варзишӣ раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, роҳбарияти Мақомоти иҷрояи ҳокимияти давлатии вилояти Суғд, ду карат қаҳрамони бозиҳои олимпӣ Алексей Тишенко иштироку суханронӣ намуданд.

Таъкид гардид, ки дар Тоҷикистон бо шарофати Истиқлоли давлатӣ ва таваҷҷуҳи хосаи Пешвои миллат муҳтарам Эмомалӣ Раҳмон соҳаи варзиш рушд намуда, барои баргузории чорабиниҳои варзишии сатҳи ҷаҳонӣ шароит фароҳам оварда шудааст. Натиҷаи чунин ғамхориҳо буд, ки варзишгарони тоҷик ба дастовардҳои арзанда ноил гардида, сафи варзишдӯстон аз ҳисоби наврасону ҷавонон сол аз сол бештар мешавад.

Дар мусобиқаи байналмилалӣ оид ба бокс 90 нафар муштзан аз Федератсияи Русия, Қазоқистон, Қирғизистон ва Тоҷикистон иштирок доранд. Мусобиқа байни варзишгарон дар вазни аз 51 кг то беш аз 92 кг ҷараён гирифта, беҳтаринҳо ба даври ниҳоии мусобиқа роҳ меёбанд. Маросими қадршиносии ғолибон 12 июл, дар макони баргузории мусобиқа дар назар дошта шудааст.

Субҳиддин ҚОДИРОВ, “ҶТ”