Имрӯз дар соҳаи варзиши кишвар ҳамарӯза ситораҳои нав ба нав тулӯъ мекунанд. Рӯз аз рӯз варзишгарон аз мусобиқоти сатҳи ҷаҳонӣ дастоварду музаффариятҳои нав ба навро соҳиб гардида, дар боло бурдани имиҷи варзишии мамлакат нақши созгорро гузошта истодаанд. Ҳамин аст, ки бо шарофати варзишгарони тоҷик парчами кишвар пайваста дар мусобиқоти бонуфуз, ки дар кишварҳои хориҷ доир мегарданд, боло бардошта мешавад.

Яке аз ин номбардорони кишвар варзишгари риштаи лижаронии кӯҳӣ Сайфиддини Низомиддин аст. Ӯ аз овони кӯдакӣ худро фидоии варзиш карда, наздик аст, баландтарин қуллаи варзиширо фатҳ кунад. Сайфиддин аз дастпарварони мактаби варзишии зимистона мебошад. Борҳо дар мусобиқаҳои сатҳи дохилӣ ва байналмилалӣ ширкат варзида, натиҷаҳои назаррасро соҳиб гардидааст.

Агар ҷавонони мо ба риштаи варзиши зимистона нисбат ба дигар риштаҳои варзиш кам таваҷҷуҳ дошта бошанд ҳам, аммо ба монанди Сайфиддин нафароне ҳастанд, ки то расидан ба муваффақият дар ин риштаи варзиш ҳамарӯза кӯшишу ғайрати хешро равона карда истодаанд.

Ин қаҳрамони мо дар соли 2019 ба шаҳри Красноярски Федератсияи Русия сафарбар шуда, дар Универсиадаи ҷаҳонӣ аз риштаи гигант слало байни варзишгарони кишварҳои дигар рақобат намуд. Тавре худи ӯ мегӯяд, варзишро барои он дӯст медорад, ки он ягона касбест ба инсон имкони муаррифии кишвар ва миллаташро медиҳад.

- Ин хусусият танҳо хоси варзиш аст, барои ҳамин варзишро дӯст медораму барои комёбиҳо ҷаҳду талош мекунам. Ман дар соли 2020 ба давлати Арманистон ба мусобиқаи FIS сафарбар шудаам ва ин навбат барои роҳхат гирифтан ба Бозиҳои зимистонаи Олимпӣ, ки соли 2022 дар шаҳри Пекини Чин баргузор мегардад, рақобат хоҳам кард. Ба ин мусобиқа вақти башумор мондааст, ҳозир бошад, дар маҷмааи Сафед-дара омодагии ҷиддӣ дида истодаам. Бо итминон гуфта метавонам, ин маротиба метавонам соҳиби роҳхат гардам,- мегӯяд, Сайфиддин.

Дар ҳақиқат, агар сангеро аз роҳ гирифта, канор гузоштан хизмат ба Ватан бошад, пас номбардории он аз ҷониби варзишгарон миёни дигар давлатҳо далерии фарзандони фарзонаи ӯст. Воқеан, роҳи варзиш осон нест, чун мақсади асосӣ барои ҳар як варзишгар обрӯи миллат аст. Ба қавли ӯ ҳадафи ҳар варзишгар муаррифии миллату давлат аст.

- Бо вуҷуди душвориҳои ҷодаи варзиш мо ифтихор мекунем, ки ин масъулияти бузургро бар дӯш дорем. Имрӯзҳо аз тарафи Пешвои варзишпарвари миллат барои омода шудани варзишгарони сатҳи ҷаҳонӣ тамоми шароитҳо муҳайё шуда истодаанд. Дар баробари ин ғамхориҳо, мо варзишгаронро мебояд баҳри баланд бардоштани Парчами давлати азизи хеш талош варзем”,- мегӯяд Сайфиддин.

Чуноне ки ӯ мегӯяд, ғолибият дар Бозиҳои Олимпӣ масъулияти бузургеро худ бар дӯши варзишгарон мегузорад. Зеро бо беҳ гардидани шароитҳои фароҳамоварда ва рушди варзиш дар кишвар, варзишгарони тоҷик рақобатро бо варзишгарони садрнишини ҷаҳон оғоз намуда, баҳри ғолиб омадан дар ин мусобиқа талош хоҳанд кард. Воқеан, ба варзиш ва обутоби ҷисмонӣ ҷалб намудани ҷавонон ва тануманду солиму қавирӯҳ ба камол расонидани онҳо вазифаи муҳимми устодон дар назди шогирдон мебошад. Сайфиддини Низомиддин миннатдор аз он аст, ки устодонаш меҳри варзиши лижаронии кӯҳиро, бо вуҷуди мушкил буданаш, аз хурдсолӣ дар қалбаш ҷо кардаву ба мусобиқаҳо ӯро омода сохтаанд.

Малоҳат ХОЛМУРОДОВА, “ҶТ”