5 октябри соли 2017 чун анъана дар Варзишгоҳи марказии шаҳри Ваҳдат барои дарёфти 5-умин Ҷоми Президенти Тоҷикистон оид ба ҷудо варзишгарони 15 давлати дунё: Қазоқистон, Қирғизистон, Афғонистон, Покистон, Эрон, Русия, Германия, Непал, Япония, Беларус, Украина, Голландия, Америка, Куба ва Тоҷикистон миёни ҳам рақобат карданд. Рақобатҳо барои ба даст овардани ҷойҳои ифтихорӣ дар вазни мутлақ сурат гирифта, паҳлавони номдори тоҷик Саидҷалол Саидов соҳиби 5-умин Ҷоми Президенти Ҷумҳурии Тоҷикистон гардид.

Бояд гуфт, ки Саидҷалол Саидов даҳ маротиба чемпиони Тоҷикистон (2004-2005 наврасон, 2006-2007 ҷавонон, 2010, 2011, 2013, 2014, 2016, 2017 калонсолон), дорандаи ду медали биринҷии Осиё аз намуди гӯштини ҷудо, соли 2013 чемпиони ҷаҳон аз рӯи намуди гӯштини кураш дар вазни 81 кило дар давлати Туркия, ҷоизадори чемпионати ҷаҳон аз намуди самбо, барандаи ҷоизаҳои зиёд аз рӯи намуди гӯштини миллӣ, устоди дараҷаи байналмилӣ дар се навъи гӯштин:ҷудо, самбо ва кураш аст. Баъди ба даст овардани 5-умин Ҷоми Президенти Тоҷикистон бо ин паҳлавони номдори тоҷик суҳбат оростем, ки фишурдаи онро пешкаши хонандаи азиз мегардонем.

- Овони кӯдакию наврасиро чӣ гуна ва бо кадом машғулиятҳо сипарӣ намудаед?

- Овони кӯдакию наврасиям дур аз гӯштин буд. Натанҳо гӯштин, балки ба ягон навъи варзиш шавқу ҳавас набуд. То синфи шашум дунболи бозиҳои кӯдакӣ мегаштам.

- Кӣ ва ё чӣ сабаби ба варзиш пайвастанатон шуд?

- Вақте ки бахшида ба ҷашни Наврӯз маракаҳои гӯштингирию бузкашӣ баргузор мегардид, тағоям Маҳмадраҳим Муминов маро бо писарашон маҷбуран ба гӯштин мебурданд. Вале ин амалашон низ шавқи гӯштинро дар дилам ҷо карда натавонист. Баъдан, маро ба Мактаб-интернати варзишии шаҳри Душанбе, назди мураббии гӯштин Салимҷон Аҳмадов бурданд. Давоми қариб ду сол аз тамринҳо мегурехтам. Дар яке аз мусобиқаҳои шаҳрӣ тағоям барои мухлисии ман омада буд ва ман қувваозмоиро бохта, аз ӯ сахт сарзаниш шунидам. Баъди ин ҳодиса дар назди худ мақсад гузоштам барои сидқан тамрин намудан. Вале мураббиям бовар надоштанд, ки ман ҷиддӣ ба ин касб машғул мешавам. Аз ин рӯ, маро ба яке аз ҳамсабақони фаъолам вогузор карданд. Ӯ чӣ супорише медод, ман иҷро мекардам – толорро тоза менамудам, ҷуздони варзишӣ мебардоштам, баъди тамрин бошад, иловатан маро ҳаракатҳои варзиширо фармон медод. Аз байн 8 моҳ гузашту мусобиқаи кушоди ҷумҳуриявӣ барои дарёфти Ҷоизаи Саидаҳтам Раҳимов баргузор гардид. Дар он мақоми дуюмро ишғол намудам ва ин мақому дастгирӣ ёфтанам маро ба варзиш пайваст, ки айни ҳол дар тору пудам ҷо гирифтаасту бе он наметавонам.

- Дар варзиш бохтро чӣ гуна қабул доред?

- Ҳар як варзишгар ба хотири ғалаба вориди сабқат мегардад ва варзиш бошад, бе бохт намешавад. Варзишгаре, ки бохтро қабул карда наметавонад, ӯ варзишгари асил нест. Он варзишгаре муваффақ аст, ки баъди бохт ҳисси миллияш боло мегирад, нангу номус мекунад ва дар мусобиқаҳои баъдӣ бо маҳорату малакаи худ номи миллатро муаррифию хотири мухлисонашро шод мегардонад. Давлат барои варзишгар шароит фароҳам меорад, барои сафарбаркунӣ ба мусобиқаҳо маблағҳои зиёд сарф мекунад. Вазифаи асосии варзиш танҳо як чиз аст - муаррифии миллату давлат. Он варзишгаре, ки баъди бохт тарки варзиш мекунад, мақсадаш муаррифии миллат нест. Ӯ танҳо барои саломатияш тамрин мекунад. Аз ин рӯ, баъди бохт кӯшиш мекунам, ки то мусобиқаи оянда, пеш аз ҳама, ҳолати равонии худро барқарор созам. То ҳол аз варзиш канор рафтанро фикр накардаам, зеро дар зиндагӣ чизе дорам, аз варзиш аст. Дар кучаҳо ҳурмату иззатро низ аз варзиш ба даст овардаам ва дар назди худ мақсад гузоштам, ки то вақте дар бадан саломатию қувва дорам, бо варзиш мемонам.

- Қувваозмоӣ бо Комроншоҳи Устопириён дар вохӯрии финалии мусобиқаи Ҷоми “Пойтахт-2017” аз намуди гӯштини миллӣ миёни мухлисон сару садоҳои зиёдро ба бор овард. Андешаи Шумо оиди ин масъала?

- Дар кишвари маҳбубамон ҳаводорону мухлисони гӯштин, махсусан гӯштини миллӣ хело зиёд аст, ки ин ифтихори мо - варзишгарон мебошад. Ҳамасола дар арафаи Наврӯзи байналмилалӣ аз ҷониби Пешвои варзишдӯстамон мусобиқаи кушоди ҷумҳуриявӣ аз намуди гӯштини миллӣ гузаронида мешавад ва Пешвои миллат ҳар сол ба хотири ҳавасмандгардонии паҳлавонон туҳфаҳои гаронарзиш тақдим мекунанд. Имсол низ чун анъана, мусобиқаи мазкур дар шаҳри Турсунзода баргузор гардид. Ман бо Комроншоҳ ба вохӯрии финалӣ роҳ ёфтем. Мухлисони гӯштин Комроншоҳро дастгирӣ карданду ҷониби ман қуттиҳои холӣ ҳаво доданд ва нахостанд, ки соҳиби шоҳҷоиза ман бошам. Новобаста аз ин, ман бохтро қабул кардаму дасти Комроншоҳро боло бардоштам. Ин амал боиси аксуламали ҳаводорони гӯштин шуд ва ҳама аз ҷо бархеста кафкӯбӣ намуданд. Баъди ду рӯз – 23 март бо иқдоми раиси шаҳри Душанбе муҳтарам Рустами Эмомалӣ мусобиқаи гӯштини миллӣ барои дарёфти Ҷоми “Пойтахт-2017” баргузор гардид ва боз ману Комроншоҳ ба даври ниҳоӣ роҳ ёфтем. Дар ин вохӯрӣ Комроншоҳ бо як огоҳӣ бохт ва ман ғолиби мусобиқа эълон шудам. Мухлисон дар ин вохӯрӣ маро ҷонибдорӣ карданд ва ин аслан хоси мухлис ва хоҳиши шахсии он аст, ки киро ҷонибдорӣ мекунад. Ин ҳолат боиси нофаҳмӣ на миёни ману Комроншоҳ, балки миёни Комроншоҳу мухлисон шуд. Баъди ин мо якҷо дар чандин мусобиқаҳо Тоҷикистони азизамонро муаррифӣ намудем ва дар 5-умин Ҷоми Президенти Тоҷикистон оид ба ҷудо дар финал вохӯрдем ва ман бо як вазарӣ боз ғолиб омадам. Аз ин рӯ, ман на аз ягон варзишгар хафа шудаам, на аз мухлисон. Мақсади мо як аст - муаррифии давлат дар олимпиада!

- Дар баробари қаҳрамони Осиё, ҷаҳон ва Олимпиада шудан орзуи барандаи Ҷоми Президенти Тоҷикистон шуданро доштед?

- Ҷоми Президенти Тоҷикистон мусобиқаест, ки сол то сол мақом ва шӯҳрати зиёдро ба худ касб мекунад. Зеро таъсисдиҳандагони Ҷом барои ғолибон маблағе медиҳанд, ки ба мусобиқаҳои Федератсияи ҷаҳонии ҷудо баробар аст. Аз ин рӯ, ҳамасола беҳтаринҳои ҷаҳон барои ба даст овардани Ҷоми Президенти Тоҷикистон ба Ватани мо ташриф меоранд. Ман низ қатори дигар паҳлавонон соли 2013, аз замони таъсисёбии ҷоми мазкур барои қаҳрамон шудан мубориза бурдаам. Соли 2014 дар вазни мутлақ мақоми сеюмро касб намудам. Барои соҳиби Ҷом гардидан мушкилиҳои зиёд пушти сар гардид ва ман хурсанд аз онам, ки 5-умин Ҷоми Президенти Тоҷикистон насиби ман шуд.

- Ба андешаи Шумо барои ба даст овардани медали тиллои олимпӣ аз намуди гӯштини ҷудо чӣ корҳоро бояд анҷом дод?

- Зиндагӣ бе камбудӣ намешавад. Мо чӣ қадар барои зиндагии худ шароит фароҳам созем, бо як назар афкандан садҳо камбудии дигар пайдо мешавад. Шукронаи Истиқлолият, ки имрӯз дар ҷумҳуриямон мушкилоти ҷиддӣ дар соҳаи варзиш нест. Зеро Пешвои варзишпарвари мо ба варзиш таваҷҷуҳи махсус доранд. Аз замоне, ки ҷиддӣ ба варзиш машғул шудам, дар ҳар қадам ғамхории Пешвои миллатро нисбати варзишгарон эҳсос мекунам. Дар аксар мусобиқаҳои бошукӯҳ, ки бахшида ба ҷашнвораҳо гузаронида мешаванд, бевосита худашон иштирок меварзанду варзишгаронро қадрдонӣ менамоянд. Мо дар мусобиқаҳову машқҳои дастаҷамъии берун аз кишвар зиёд иштирок намудаем, бо варзишгарони хориҷ суҳбатҳо меоростем. Онҳо барои дастовардҳояшон аз ҷониби ташкилоту муассисаҳо қадрдонӣ мешаванд, лекин мисли варзишгарони тоҷик не. Вақте мо бо варзишгарони ИМА суҳбат доштем, онҳо барои медали олимпӣ пули ночиз мегирифтаанд. Бинед, ки Пешвои миллат, муҳтарам Эмомалӣ Раҳмон барои медали тиллои бозиҳои олимпӣ 300 ҳазор сомонӣ туҳфа мекунанд. Чунин иқдомҳо зиёд шаванду дар баробари Пешвои миллат соҳибкорон низ варзишгаронро дастгирӣ намоянд, на танҳо аз намуди ҷудо, балки аз дигар навъҳои варзиш ҳам варзишгарони мо медали тиллои бозиҳои олимпиро ба даст меоранд.

- Оянда чӣ нақшаҳо доред?

- Барои иштирок дар Олимпиадаи Рио-2016 кӯшишҳои зиёд намудам, барои роҳхат пайдо намудан машаққатҳои зиёд пушти сар шуд, ки инро танҳо варзишгар эҳсос мекунад. Мутаассифона, даҳ хол барои иштирок нарасид. Имрӯзҳо бошад, танҳо барои ба даст овардани холҳои зарурии Олимпиадаи Токио-2020 талош дорам ва мақсаду нақшаҳои оянда ҳамагӣ ҳамин аст. Ин фурсатро истифода намуда, ба тамоми мухлисону мутассадиёни соҳаи варзиши кишвар миннатдорӣ байён мекунам, ки дар ҳамаи мусобиқаҳо моро дастгирӣ мекунанд ва мо дар ҷавоби ғамхориҳо кӯшиш мекунем, ки дар Олимпиадаи Токио-2020 сазовори ин ғамхориҳо бошем.

- Ташаккур барои суҳбат.