Дар даври нуҳуми лигаи олӣ оид ба футбол, пеш аз бозии дастаҳои ССКА “Помир”-и шаҳри Душанбе ва “Регар- ТадАЗ”-и шаҳри Турсунзода, Федератсияи футболи Тоҷикистон беҳтарин футболбози дастаҳои лигаи олиро дар моҳи апрели соли 2017 эълон намуд. Ин ҷоиза насиби футболбози 18-солаи тими ССКА “Помир”- и шаҳри Душанбе Шарафҷон Солиев гардид.

Шарафҷон Солиев дар хариду фурӯши зимистонаи соли 2016 аз дастаи ҷавонони “Истиқлол” ба ССКА “Помир” пайвастааст, ки дар ин мавсим яке аз футболбозони калидии тими ССКА “Помир” маҳсуб меёбад.

Солиев дастпарвари мактаби варзишии кӯдаконаи шаҳри Ваҳдат буда, ибтидои омаданашро ба бошгоҳи мазкур чунин ёдовар шуд: “Ҳар гоҳе ки дар кӯчаамон бо кӯдакон футболбозӣ менамудам, ҳамсояамон Саъдӣ, ки худ футболбоз буд, бозии маро мушоҳида менамуд. Рӯзе маро гирифта ба бошгоҳи кӯдаконаи “Ваҳдат” бурд ва нахустин бор дар синни 6-солагиам зери роҳбарии Неъмат Ҷураев ба майдони футбол қадам ниҳодам. Бисёр шавқ доштам, то футболбоз шавам. Аз ин рӯ, ҳамеша дар тамринҳо гуфтаи мураббиро иҷро менамудаму нозукиеро аз бар мекардам.

Неъмат Ҷураев чусту чолокии наврасро дида, ӯро ҳамчун ҳамлагари даста тарбия менамояд. “Вақте, ки ба назди ман ин наврасро оварданд ва бозии ӯро дар майдон тамошо намудам, дар чеҳраи ӯ яке аз футболбозони хубро ёфтам”, - мегӯяд Неъмат Ҷураев, нахустин мураббии Шарафҷон.

Шарафҷон Солиев дар дастаи наврасони “Ваҳдат”-и шаҳри Ваҳдат таи 7 сол малакаву маҳорати футболбозиашро сайқал дода, соли 2013 ба дастаи ҷавонони “Хайр”-и Ваҳдат мегузарад. Ӯ гуфт, “Тими ҷавонони “Хайр” бо дастаи мо бозии рафиқона баргузор намуд ва пас аз бозӣ сармураббии дастаи “Хайр” Юсуф Абдуллоев маро ба наздаш даъват намуда, ба дастааш таклиф намуд”.

Акнун Шарафро лозим буд, ки дар дастаи “Хайр”-и шаҳри Ваҳдат бозии хуб нишон диҳад ва боварии сармураббиашро зиёдтар намояд. Солиев тӯли якуним сол ҳамчун футболбози захиравии “Хайр” дониста мешуд ва соли 2013 бо дастаи захиравии “Хайр” чемпионии Тоҷикистонро ба даст овардааст.

Дар мавсими зимистонаи соли 2015 Шарафҷон шомили ҳайати асосии тими “Хайр” гардид ва бори нахуст аз дастаи асосии “Хайр” бар муқобили дастаи “Хуҷанд”-и шаҳри Хуҷанд ба майдон баромад. “Дақиқаҳои 80-уми қисми дуюми бозӣ ҳисоб 0:0 рафта истода буд, футболбозони “Хуҷанд” дар назди дарвозаашон ба хатоӣ роҳ доданд ва довар зарбаи ҷаримавӣ таъин намуд. Задани зарбаро ҳамдастаҳоям ба ман вогузоштанд ва билохира ман бо як зарба тавонистам дарвозаи рақибро рахна намоям, ки ин голи нахустини ман дар карераи касбиам мебошад”.

Шарафҷон дар давоми як мавсим дар лигаи олии кишвар аз ҳайати асосии тими “Хайр” тамоми малакаву маҳорати футболбозиашро ба харҷ дода, яке аз бозингарони асосӣ дониста мешавад. Бозии хуби ӯро дида, дар трансфери тобистонаи мавсими 2016 дастаи ҷавонони “Истиқлол” ба ҳайаташ даъват мекунад. Бори нахуст аз тими ҷавонони “Истиқлол” бо дастаи ҷавонони “Хуҷанд” ба рақобат мебарояд ва дар ин бозӣ ду голи дастаашро ба номаш менависад ва ҳисоб 2:1 хотима меёбад.

Шарафҷон як мавсим дар тими ҷавонони “Истиқлол” бозӣ намуда, дар хариду фурӯши зимистона ба дастаи “Помир” мегузарад ва дар ин бошгоҳ то имрӯз ҳамчун ниммуҳофизатгар ба майдон мебарояд.

Олимшоҳ Қадамшоев, мураббии ҷавонони тими ССКА “Помир” иброз дошт, ки “бо қарори нави Федератсияи футбол имсол чемпионати Тоҷикистон дар се марҳила гузаронда мешавад. Шарафҷон дар ҳоли ҳозир яке аз футболбозони хуби даста маҳсуб меёбад ва дар ҳар як бозӣ беҳбудии ӯ ба назар мерасад. Мо умед дорем Шарафҷон дар солҳои наздик яке аз футболбозони хуби футболи тоҷик дониста хоҳад шуд”.

Шарафҷон Солиевро имсол роҳбари тими мунтахаби ҷавонони то 18-солаи кишвар Витали Левченко ба дастааш даъват намудааст. Шараф мегӯяд, “Ягона орзуи ман дар дастаи мунтахаби кишвар бозӣ намудан мебошад”. Дар ин роҳ барояш барору комёбӣ таманно дорем.

Шаҳбози АСОМИДДИН, “ҶТ”