28 феврал Абдувосид Ғафуров, мудири Бахши кор бо ҷавонон ва варзиши шаҳри Хуҷанд аз толори варзишии “Тоҷиктелеком”-и шаҳр, ки дар он беш аз 100 нафар наврасону ҷавонон бо роҳбарии мураббиён Даврон Тошбоев ва Ғуфрон Тошбоев машқу тамрин менамоянд, боздид намуда, бо варзишгарони намуди гӯштини самбо суҳбат намуданд.

Зимни суҳбат доир ба дастгирии ҳамаҷонибаи ҷавонону варзишгарон аз ҷониби давлату Ҳукумати кишвар андешаронӣ суханронӣ сурат гирифта, таъкид гардид, ки бо туфайли дастгириҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон варзишгарони мамлакат дар мусобиқаҳои дохиливу байналмилалӣ фаъолона ширкат намуда, шараф ва нуфузи кишвари соҳибистиқлоли моро баланд мебардоранд.

Дар ҷараёни суҳбат гуфта шуд, ки бояд ҷавонон зиракии сиёсиро аз даст надиҳанд ва муқобили ҳама гуна зуҳуроти номатлуб бо неруи ҷисмониву зеҳнии худ муборизаи беамон баранд.

Варзишгарон низ дар навбати худ изҳор доштанд, ки минбаъд низ тамоми қувваи худро барои тарғиб ва аз худ намудани ин намуди варзиш сафарбар намуда, барои баланд бардоштани номи кишвар дар арсаи ҷаҳонӣ талош меварзанд.