Нимаи дуюми рӯзи 23 май дар идомаи тантанаҳои ҷашнӣ бахшида ба Рӯзи ҷавонони Тоҷикистон дар Кохи Суруш таҳти унвони “Ҷовидон бод ҷавонӣ ва ҷавонон” чорабинии фарҳангӣ доир шуд.

Дар чорабинӣ Аҳтам Абдуллозода, раиси Кумитаи кор бо ҷавонон ва варзиш, муовинони раиси КҶВ, намояндагон аз вазорату кумитаҳо, ҷавонон ва донишҷӯёни фаъол аз донишгоҳу донишкадаҳои кишвар иштирок намуда, он  дар сатҳи баланд ҷараён гирифт.

Аҳтам Абдуллозода,  раиси Кумитаи кор бо ҷавонон ва варзиш, зимни сухани ифтитоҳӣ аз мавқеи ҷавонон дар рушду нумуи ҷомеа ёдовар шуда, қайд кард, ки бидуни саҳми арзандаи ин қишр ба рушди бонизом расидан, ғайриимкон аст. Танҳо ҷавонони дорои эҳсоси баланди ватандорӣ, андешаҳои солими сиёсӣ ва заковатманду созанда метавонанд, дар боло бурдани нуфузи давлат саҳмгузор бошанд.

- Ҳоло нақш ва иштироки ҷавонон дар сиёсат, рушди соҳаҳои иҷтимоӣ, иқтисодӣ ва фарҳангӣ назаррас мебошад. Дастовардҳои  ҷавонони давраи истиқлолият дар ҷодаи истеҳсолоту саноат, илму техника, фарҳанг, варзиш ва дигар самтҳои афзалиятнок имрӯз чашмрасанд. Устуворӣ ва садоқати ҷавонон барои рушди давлат заминаи хуб мегузорад. Ҷавонони кишвари мо бояд қадри ин хоку оби сарзамини биҳиштосоро донанд ва ҳаргиз нагузоранд, ки миллати ҳазорҳо сол ранҷдида, аз ин музаффариятҳое, ки имрӯзҳо ба даст овардааст, маҳрум гардад, - гуфт Аҳтам Абдуллозода.

Гуфта шуд, ки агар саҳифаҳои таърихи халқи тоҷикро варақ занем, ба хубӣ дарк менамоем, ки ҷавонони тоҷик ҳамеша дар хати пеши навсозиҳо қарор гирифта, аз муборизони асосӣ дар роҳи дарёфт ва расидан ба Истиқлолияти давлатии кишварамон  мебошанд. Ин анъанаи насли пешинаи ҷавонони тоҷик имрӯз бояд сармашқи кору пайкори насли нав қарор гирад.

Пас аз суханронӣ қисмати фарҳангии чорабинӣ шуруъ гардида, дар он ҳунармандони ҳирфавию боистеъдод дар васфи ишқу ҷавонӣ суруду таронаҳои марғуб сароиданд.