25-уми феврал дар ноҳияи Айнӣ бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҳамоиши гирандагони Стипендияи президентӣ таҳти унвони “Мо -ҷавонон пайравони Пешвои миллат” баргузор гардид.

Дар ҳамоиш Абдулло Раҳмонзода - раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Муқим Муродзода - раиси ноҳияи Айнӣ, Каримзода Мирзоқосим - сардори Раёсати кор бо ҷавонон ва варзиши вилояти Суғд ва гирандагони Стипендияи президентӣ аз шаҳру ноҳияҳои Панҷакент, Айнӣ ва Кӯҳистони Мастчоҳ ширкат варзиданд.

Чорабинӣ бо садо додани Суруди миллӣ оғоз ёфт.

Сипас Абдулло Раҳмонзода, раиси КҶВ суханронӣ намуда, аз ҷумла иброз доштанд, “Бо ташаббус ва дастгириҳои пайвастаи Пешвои муаззами миллат имрӯз ҷиҳати ҳавасмандгардонии ҷавонони лаёқатманду босавод имтиёзҳои гуногун роҳандозӣ карда шудааст, ки аз ин иқдомҳо таъсиси Стипендияи президентӣ барои донишҷӯён ва хонандагони муассисаҳои таҳсилоти миёнаи умумӣ, ибтидоӣ ва миёнаи касбӣ мебошад, ки имрӯз теъдоди он 3000 адад мебошад. Маҳз дар синни ҷавонӣ инсон ояндаи дуру наздики худро муайян месозад. Ҳар як амале, ки имрӯз дар овони ҷавони иҷро мешавад, натиҷа ва самараи худро ба бор хоҳад овард. Аз ин лиҳоз, дар ин айём тарбияи насли ҷавон дар рӯҳияи ватандӯстӣ, инсондӯстӣ ва эҳтироми фарҳангу тамаддуни миллӣ ниҳоят манфиатбахш мебошад, ки ин яке аз ҳадафҳои асосии Ҳукумати Ҷумҳурии Тоҷикистон маҳсуб меёбад”.

Дар идома гирандагони Стипендияи президентӣ низ баромад намуда, ба Пешвои муаззами миллат ҷиҳати дастгириҳои пайваста изҳори сипос намуданд.

Дар охир дар фазои тантанавӣ ба барандагони Стипендияи президентӣ дар соли таҳсили 2021-2022 аз ҷониби раиси Кумита ва раиси ноҳияи Айнӣ шаҳодатнома ва маблағи стипендия супорида шуд.