Тавре иттилоъ дода будем, аз 14 то 22 октябри соли равон дар шаҳри Сочии Федератсияи Русия XIX-умин Фестивали ҷаҳонии ҷавонон ва донишҷӯён баргузор гардид, ки Тоҷикистонро дар ин чорабинӣ 103 ҷавон бо самимияти хосса муаррифӣ намуданд.

Қабл аз шурӯи Фестивал дар шаҳри Москваи Федератсияи Русия вохӯрӣ ва ҷаласаи 
роҳбарони мақомоти кор бо ҷавонони беш аз 50 кишвари ҷаҳон доир шуд, ки дар он раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода ширкат дошт.

Зимни ин ҳамоиш масъалаҳои асосии кор бо ҷавонон, мушкилот ва роҳи ҳалли онҳо баррасӣ гардид. Ҳамин тариқ, зарур шуморида шуд, ки минбаъд ҳамкории мақомоти кор бо ҷавонони кишварҳои ширкаткунанда ҷиҳати бартараф намудани мушкилоти ҷавонон бояд тақвият дода шавад.

Баъд аз ҳамоиш дар шаҳри Москва раҳпаймоии ҷавонони ин кишварҳо дар масофаи 9 км доир гардид, ки ҷавонони Тоҷикистон дар он фаъолона ширкат намуданд. Пас аз ин Фестивали байналмилалии ҷавонон ва донишҷӯён дар шаҳри Сочии Русия ба кори худ оғоз намуд.

Дар фестивали мазкур ҳамарӯза семинару тренинг, чорабиниҳои фарҳангиву фароғатӣ бо иштироки санъаткорони машҳури ҷаҳонӣ, чорабиниҳои варзишиву солимӣ ва иқтисодӣ-омӯзишӣ барои рушди оянда, технологияҳои навин, ояндаи илм ва маорифи ҷаҳон ва мулоқоти иштирокчиён бо сиёсатмадорон, фарҳангён, варзишгарон ва чеҳраҳои маъруфи ҷаҳон баргузор мегардид.

Инчунин, дар Фестивал рӯзҳои қитъаҳои ҷаҳон эълон шуда буд, ки ҷавонони Тоҷикистон низ дар Рӯзи фарҳангии Осиё бо муаррифии анъана ва фарҳанги нотакрори худ диққати ҳамагонро ба худ ҷалб намуданд.

Дар ҳошияи баргузории ин фестивал мулоқоти ҷавонон дар доираи давлатҳои аъзои Иттиҳоди Давлатҳои Мустақил баргузор гардид. Дар он намояндагони ҷавонони Федератсияи Русия, ҷумҳуриҳои Белорус, Қазоқистон, Туркманистон, Тоҷикистон, Озарбойҷон ва Қирғизистон иштирок намуданд. Ҷониби кишвари моро намояндагони Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва волонтёрон муаррифӣ карданд.

Дар мулоқоти мазкур масъалаҳои марбут ба татбиқи сиёсати давлатии ҷавонон дар кишварҳои аъзои ИДМ, рушди маърифати ҳуқуқиву сиёсии ҷавонон ва дастгирии соҳибкорони ҷавон мавриди баррасӣ қарор дода шуданд.

Зимни суханронӣ роҷеъ ба татбиқи сиёсати давлатии ҷавонон дар Тоҷикистон Умед Раҳимов, муовини озоди раиси Иттифоқи ҷавонони Тоҷикистон изҳор дошт, ки “яке аз самтҳои афзалиятноки сиёсати давлатии ҷавонон дар давлати мо ин дуруст тарбия намудани насли наврас мутобиқи талаботи замон мебошад, ки моҳияти миллии сиёсати давлати моро дар соҳаи кору тарбия бо ҷавонон ифода менамояд. Аз ин рӯ, бо назардошти нақши ҷавонон дар рушди ҷомеа ва ғамхории бештар нисбати ин қишри фаъол аз ҷониби Президенти кишварамон, муҳтарам Эмомалӣ Раҳмон соли 2017 дар Ҷумҳурии Тоҷикистони “Соли ҷавонон” эълон гардид ва мо пайваста кӯшиш менамоем, ки шароиту имконоти беҳтарро барои ҷавонони кишварамон фароҳам оварем”.

Ҳамчунин, зимни мулоқот ба масъалаҳои пешгирии шомилшавии ҷавонон ба ҳизбу ҳаракатҳои номатлуби ҷаҳонӣ, қочоқи маводи мухаддир миёни ин насл ва дигар ҷиноятҳои муташаккили фаромилӣ таваҷҷуҳ зоҳир гардид. Зикр шуд, ки ҷавонон бояд бо корҳои манфиатовар машғул шаванд, худро аз ҳар гуна хавфҳои хатарноки ҷаҳонӣ эмин нигоҳ дошта, дар пешравии кишварҳои хеш саҳмгузорӣ намоянд.

Дар интиҳои мулоқот изҳори боварӣ карда шуд, ки дар самти амалишавии ҳадафу мақсадҳои гузошташуда кишварҳо метавонанд муваффақ гарданд.

Ҳамзамон, дар ҳошияи фестивали мазкур намоишгоҳи миллии кишварҳо доир шуд, ки ҷавонони тоҷик бо ба намоиш гузоштани расму анъанаҳои миллӣ бо шавқу ҳавас ба хориҷиён оид ба меҳани худ маълумот доданд.

- Намоишгоҳи мо байни намоишгоҳи давлатҳои Қирғизистон ва Ҷумҳурии мардумии Чин қарор дошт. Намоишгоҳи Тоҷикистон аз рӯзи аввали Фестивал то ба рӯзи охир ниҳоят серодам буд ва назар ба дигар давлатҳо диққати бештари иштирокчиён ба Ватани мо равона шуда буд. Зимни ҳамсӯҳбат шудан кӯшиш мекардем, ки фарҳангу табиати нотакрори меҳанро ба хориҷиён ҳарчи бештар тарғиб намуда, онҳоро барои дидан намудан аз кишвари меҳмоннавоз, офтобӣ ва сайёҳиамон даъват менамудем – мегӯяд иштирокчии ин фестивал, донишҷӯи Донишгоҳи давлатии Данғара Сӯҳроб Авлиёқулов.

Дар муҳокимарониҳо оид ба мушкилот дар соҳаи экология ташаббусҳои байналмилалии Тоҷикистон барои ҳалли мушкилоти умумиҷаҳонӣ дар асри 21 доир ба муҳофизати табиат аз ҷониби таҳлилгарон баҳои баланд дода шуд.

- Бо як ҷаҳон самимият, изҳори сипос ва миннатдории худро ҳамчун як ҷавони фаъол ва хушиқболи Ватан ба Ҳукумати ҷумҳурӣ мерасонам, ки барои иштироки ман дар чунин як чорабинии сатҳи байналмилалӣ мусоидат намуданд. Ман аз ҷумлаи он ҷавонони хушбахте ҳастам, ки дар “Соли ҷавонон” ҳамчун аъзои ҳайати Тоҷикистон дар Фестивали байналмилалии ҷавонон ва донишҷӯён ширкат намудам. Ин бароям ифтихор ва рӯйдоди фаромӯшнашаванда аст. Донишу таҷриба, маҳорату малака ва аз ҳама муҳим, он таассуроте, ки аз фестивал бардоштам, албатта, бо ҳисси баланди ватандӯстӣ ва меҳанпарастӣ барои боз ҳам зебою беҳтар гардонидани Тоҷикистони азизам истифода мебарам, – афзуд Шодмон Нурматов, ҷавони фаъол аз вилояти Суғд.

Амир УРУНОВ, “ҶТ”, Душанбе-Сочӣ-Душанбе