Имсол ҳам монанди панҷ соли охир аз якуми март давраи бақайдгирӣ барои дохил шудан ба макотиби олӣ ва миёнаи касбии кишвар тариқи Маркази милии тестии назди Президенти Ҷумҳурии Тоҷикистон шурӯъ гардид. 

Доир ба шаффофияти фаъолияти Маркази миллии тестӣ шаш сол аст, ки ВАО матолибҳои гуногун пахшу нашр мекунанд. Дар ин росто метавон гуфт, ки доир ба тарзи бақайдгирӣ, имтиҳонсупорӣ, кор дар кабинети инфиродӣ... довталабон пурра маълумот дошта, иловатан дигар қишрҳои ҷомеа ҳам, ки алоқае ба ин доранд, бо хабар ҳастанд. 

Вале як чиз зери парда монда аст: довталабон, ҳамон нафароне, ки дар фаъолияти Маркази милии тестӣ нақши асосиро мебозанд канор мондаанд. Яъне кулли матолибе, ки тариқи ВАО-и кишвар нашру пахш мешаванд, сухани мутахассисон ва масъулин ҳастанд. Дар ин маврид метавон гуфт, ки матолиби нашр гардида пурра хусусияти маълумотдиҳӣ доранд.  Шахсан худи ман то ҳол ба контенте рӯ ба рӯ нашудаам, ки довталабон суханҳои худро гуфта бошанд. 

Имрӯз бошад, мо ду нафар довталаб- Шукуфа Лайлишоева хонандаи синфи 11-и МТМУ №66 ва Калбодов Рамазон хонандаи синфи 11-и МТМУ №9-ро, ки имсол тариқи Маркази миллии тестӣ имтиҳон месупоранд, ба идораи нашрия даъват кардем ва ба чанд саволамон ҷавоб гирифтем.

- “ҶТ”: Салом ба Шумо, хуш омадед ба рӯзномаи “Ҷавонони Тоҷикистон”!

- Ш.Л.: Алейкум салом, ташаккури зиёд!

- Р.К.: Воалейкум салом, раҳмат!

“ҶТ”: Шумо довталаби кадом кластер ҳастед?

- Ш.Л.: Ман довталаби кластери 2-юм ҳастам ва насиб бошад дар оянда иқтисодчӣ мешавам.

- Р.К.: Ман довталаби кластери 1-ум ҳастам ва дар оянда мехоҳам соҳибкасб шуда, дар неругоҳҳои барқӣ кор кунам.

- “ҶТ”: Шумо кай тасмим гирифтед, ки ҳамин касбҳоро бояд интихоб кунед?

- Ш.Л.: Ҳангоми таҳсил дар синфи 10

- Р.К.: Дар синфи 9

- “ҶТ”: Ихтисосҳоятонро чӣ гуна қабул кардед?

- Ш.Л.: Худам беёрии касе касби ояндаамро қабул кардам. Бояд бигӯям, ки нисбат ба ин касби интихоб кардаам шавқу завқ зиёд доштаму дорам.

- Р.К.: Ман ҳам худам бо хоҳиши худам аз рӯйи шавқу завқе, ки дар дилам доштам ихтисосҳоямро интихоб кардам.

- “ҶТ”: Шумо касбҳоятонро мешиносед, гуфта метавонед, ки ба ин солҳои наздик намемиранд?

- Ш.Л.: Бале,  ман фикр намекунам, ки касби ман миранда бошад, зеро иқтисодчӣ дар ҳама гуна ҳолат дар рӯзгори мо лозим аст.

- Р.К.: Ман гуфта метавонам, ки то андозае касбамро шинохтаам ва дар ҳама ҳолат нафаре, ки қобилияти кор дар неругоҳҳои барқиро дорад бекор намемонад.

- “ҶТ”: Агар дар баробари ММТ боз роҳе мебуд, ки Шумо метавонистед ба мактаби олӣ дохил шавед, кадомашро интихоб мекардед?

- Ш.Л.: Маркази миллии тестиро интихоб мекардам.

- Р.К.: Ман ҳам дар ҳама ҳолат Маркази миллии тестиро интихоб мекардам.

 “ҶТ”: Сабаби ин дӯстдорӣ ва муҳаббат ба фаъолияти ММТ дар чист?

- Ш.Л.: Имтиҳонсупорӣ осонтар аст. Ва боз метавонем то 12 ихтисосро интихоб намоем.

- Р.К.: Тариқи Маркази миллии тестӣ ҳама чиз осону сода аст. 

- “ҶТ”: Аз 12 интихоб дида, 3 интихоб хуб набуд?

- Ш.Л.: Не, ҳамин тавр 12 ихтисос хуб аст. 

- Р.К.:: Ба фикри ман то чанде ки интихоб зиёд бошад ҳамон қадар имкони донишҷӯ шудан зиёд мешавад.
 
- “ҶТ”: Аз 12 ихтисосе, ки қабул кардед ҳамааш писандатон ҳастанд?

- Ш.Л.: Бале, ҳамаи ихтисосҳои интихоб кардаам ба ман маҳқуланд.

- Р.К.: Аз ман бошанд қариб ҳамааш маҳқуланд.

- “ҶТ”: Табиист, ки интихоби 12-уматон наонқадар писандатон аст ва Шумо онро барои мабодо интихоб кардаед, агар, ки балатон ба он расиду халос чӣ кор мекунед? 

- Ш.Л.: Ман дар ҳамааш розиям.
 
- Р.К.: Дигар илоҷ нест, барои донишҷӯ шудану ҳаётро давом додан албатта мехонем. 

- “ҶТ”: Ихтисосҳоятонро чӣ тавр қабул кардед: буҷавӣ ва ё шартномавӣ?

- Ш.Л.: Ҳамааш ройгон.

- Р.К.: Аз ман низ.

- “ҶТ”: Тайёриҳо чӣ хел?

- Ш.Л.: Хеле хуб.  

- Р.К.: Аз моҳи январ ин тараф пурра барои дохилшавӣ омодагӣ дида истодаам.

- “ҶТ”: Одам бояд дар ҳама ҳолат тайёр бошад, раваду Шумо донишҷӯ нашудед, чӣ кор мекунед?

- Ш.Л.: Барои соли дигар тайёрӣ мебинам.

- Р.К.: Хизмати Модар-Ватан меравам.
  
- “ҶТ”: Ба фикри Шумо Маркази миллии тестӣ чӣ камбудӣ дорад?

- Ш.Л.: Камбудии аслӣ ин аст, ки фанҳои имтиҳонгириро кам кунанд. Ман намефаҳмам таърих ба иқтисодиёт чӣ алоқа дорад, ки ман аз он имтиҳон месупорам?

- Р.К.:Ман ҳам ба андешае ҳастам, ки бояд фанҳое, ки мо имтиҳон месупорем кам карда шаванд. Бисёр хуб мешавад агар танҳо имтиҳонҳои компоненти “Б” танҳо супорида шаванд.

- “ҶТ”: Боварӣ ба донишҷӯ шуданатон чанд фоиз аст?

- Ш.Л.: Боварӣ дорам, ки донишҷӯ мешавам. 

- Р.К.: 100% боварӣ дорам, ки мегузарам.

Хонандаи гиромӣ, агар Шумо ё атрофиёнатон фикри дигаре доред, пас марҳамат кунед ба идораи рӯзномаи “Ҷавонони Тоҷикистон”. Мо омода ҳастем бо довталабон, ки ояндаи миллат ҳастанд дар ҳама мавзӯъҳое, ки сухани мегуфтанӣ доранд суҳбат кунем.