Дар Рӯзи ҷавонони Тоҷикистон раиси ВМКБ Шодихони Ҷамшед бо ҷавонони вилоят мулоқот намуд ва ба чанд тан аз фаъолон ифтихорномаву мукофот тақдим кард.

Нахуст раис ҷавононро ба ифтихори ҷашнашон таҳният гуфта, қайд кард, ки феълан ин табақаи ҷомеа дар пешравии ҳамаи соҳаҳои афзалиятноки кишвар ҳиссаи сазовор доранд ва пайваста аз ҷониби Ҳукумати мамлакат, хусусан Пешвои миллат, муҳтарам Эмомалӣ Раҳмон дастгирӣ меёбанд.

Муовини сардори Раёсати кор бо ҷавонон ва варзиши ВМКБ Сураҷ Чоршанбиев ва дигар ҷавонони пешоҳанг дар навбати худ баҳри ғамхориҳои хастанопазири Роҳбарияти Олии мамлакат изҳори сипос намуда, ваъда доданд, ки минбаъд ҳам дар пешрафту гулгулшукуфии Ватан саҳми арзанда мегузоранд.

Ҳамчунин иштирокдорон аз намоиши молу маҳсулоти ҷавонон, ки дар бинои мақомоти иҷроияи маҳаллии ҳокимияти давлатии вилоят баргузор шуд, дидан карданд.

Сипас барномаи фарҳангӣ – фароғатии “Шоми ҷавонӣ” бо иқдоми раёсат доир гашт, ки дар он ҳунармандону ҳофизони ҷавон беҳтарин шеъру сурудро пешкаши ҳозирин намуданд.