Форуме, ки дар доираи он ҷавонони Тоҷикистону Қазоқистон мубодилаи таҷриба мекунанд

Аз 14 то 16 августи соли 2024 дар шаҳри Душанбе чорабинии муҳиме барои ҷавонони Тоҷикистону Қазоқистон баргузор мегардад. Дар ин бора аз бахши таҳлил ва иттилооти Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Бино ба иттилои манбаъ, чорабинӣ аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон ташкил карда шудааст ва барои мустаҳкам кардани ҳамкорӣ, мубодилаи афкор ва таҷрибаи ҷавонон, инчунин баррасии масъалаҳои калидии сиёсати ҷавонон нигаронида шудааст.

Ҳадафи баргузории форум мустаҳкам кардани ҳамкориҳо байни ташкилотҳои ҷавонони Тоҷикистон ва Қазоқистон, рушди сиёсати ҷавонон ва таҳияи стратегияҳои муштарак барои ҳалли мушкилоти мубрами ҷавонони ду кишвар, дастгирии ташаббусҳои ихтиёрӣ ва соҳибкории ҷавонон ва эҷоди платформа барои мубодилаи таҷриба ва амалисозии лоиҳаҳои муштарак гуфта мешавад.

Форуми мазкур дар самти пешвоёни ҷавон ва фаъолони ду кишвар як чорабинии муҳим арзёбӣ шудааст. Ин имконияти беназир барои мубодилаи таҷриба, барқарор кардани тамосҳои нав ва амалисозии лоиҳаҳои муштарак аст.