Бахшида ба “Соли ҷавонон” дар ҷамоати деҳоти “Пахтаобод”- ноҳияи Шаҳритуз вохӯрии раиси ноҳия бо ҷавонон баргузор гардид.

Дар вохӯрӣ иҷрокунандаи вазифаи раиси ноҳия Рамазон Оймаҳмадзода, роҳбарони мақомоти ҳифзи ҳуқуқ, роҳбарони ташкилоту муассисаҳои дахлдор, директорони муассисаҳои таълимӣ ва имомхатибони масҷидҳои панҷвақта иштирок доштанд.

Зимни суҳбат бо ҳозирин қайд гардид, ки ҷавонон ҳамчунин нерӯи созанда ва идомдиҳандаи кору пайкори насли калонсол, бояд тамоми нерӯ ва кӯшишҳои худро ҷиҳати ободу шукуфон гардонидани Тоҷикистони азиз сафарбар намоянд.

Р. Оймаҳмадзода аз афзоиши ҷинояторӣ, бахусус афзудани теъдоди худкушӣ дар қаламрави ҷамоати деҳоти “Пахтаобод” изҳори нигаронӣ карда, аз аҳли ҷомеа даъват ба амал овард, ки нисбати воқеаю рӯйдодҳои баамаломада бетараф набошанд.

Шахсони масъул ва аҳли ҷамоатчигии деҳаҳо вазифадор карда шуданд, ки барои иҷрои дастуру супоришҳои Пешвои миллат баҳри баланд бардоштани сатҳи зиндагии аҳли ҷомеа ва бартараф кардани камбудиҳои ҷойдошта мусоидат намуда, корҳои тарғиботию ташвиқотиро дар байни сокинони деҳот пурзӯр намоянд.

Умед Мирзоев, "ҶТ"